३१ जेठ, धनगढी । डाँका चोरी मुद्दामा दोषी ठहर भई १० वर्षदेखि फरार भएका एकजना अभियुक्त पक्राउ परेका छन् ।
जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) प्रतीक बिष्टले अदालतले सजायसमेत सुनाएका धनगढी उपमहानगरपालिका-२ का गोविन्दराज अवस्थीलाई पक्राउ गरिएको जानकारी दिए ।
२०६५ सालमा तत्कालीन मालाखेती गाविस वडानम्बर ७ बाट यार्सागुम्बालगायत नगद तथा जिन्सी सामान चोरीमा संलग्न रहेको भन्दै प्रहरीले अवस्थीलाई पक्राउ गरेको थियो ।
धरौटीमा छुटेका उनलाई २०६८ साल असारमा जिल्ला अदालत कैलालीले ६ महिना कैद र ४५ लाख ५५० रुपैयाँ जरिमाना सजाय सुनाएको थियो ।
अवस्थी जिल्लाको फैसलाविरुद्ध पुनरावेदन अदालत हुँदै सर्वोच्चसम्म पुगेका थिए । तर पुनरावेदन र सर्वोच्च अदालतले समेत जिल्लाकै फैसला सदर गरेको थियो । त्यसबेलादेखि नै फरार रहेका अवस्थीलाई पक्राउ गरेर जिल्ला अदालतमा पेस गरिएको प्रहरीले जनाएको छ।
