सबभन्दा धेरै कमाउने १० फुटबलर

१६ भदौ, काठमाडौं । फुटबलरहरुको चर्चा उनीहरुको खेल्ने शैली, उनीहरुले गरेको गोल, आदि कारणले हुन्छ । तर यहाँ फुटबल खेलाडीको आम्दानीबारे चर्चा गरिएको छ ।

फुटबलका स्टार खेलाडीहरुले कति आम्दानी गर्छन् त ? यहाँ सबैभन्दा धेरै आम्दानी गर्ने १० खेलाडीको नाम उल्लेख गरिएको छ । यद्यपि यहाँ उल्लेख गरिएको खेलाडीको आम्दानी कर तिर्नुभन्दा अगाडिको रकम हो भने उनीहरुले पाउने एक्स्ट्रा फि, बोनस लगायतका रकम पनि यसमा समावेश छैन ।

त्यस्तै बेसिक आम्दानी सबभन्दा धेरै हुने खेलाडीले सबैभन्दा धेरै कमाउँछन् भन्ने हुँदैन । किनकि खेलाडीले धेरै रकम स्पोन्सरसिप र इन्डोर्समेन्ट सम्झौताबाट कमाउँछन्, जुन यहाँ उल्लेख छैन ।

१. लिओनल मेस्सी (पीएसजी-प्रतिसाता १३ लाख २५ हजार डलर)

हालै मात्र बार्सिलोनाबाट पेरिस सेन्ट जर्मेन गएका स्टार फुटबलर लिओनल मेस्सी विश्वकै उत्कृष्ट फुटबल खेलाडीमध्ये एक हुन् । त्यसैले उनको बेसिक आम्दानी सबैभन्दा धेरै हुनु नौलो कुरा नहुन सक्छ । उनी प्रतिसाता १० लाख डलरभन्दा धेरै आम्दानी गर्ने एक मात्र फुटबल खेलाडी हुन् । उनको बोनस र स्पोन्सरसिपको पैसा जोड्दा आम्दानी अझै धेरै हुन जान्छ ।

२. नेयमार (पीएसजी-प्रतिसाता ८ लाख ३६ डलर)

पीएसजीका ब्राजिलियन स्ट्राइकर नेयमार सबभन्दा धेरै आम्दानी गर्ने खेलाडीको दोस्रो स्थानमा छन् । उनको बेसिक आम्दानी प्रतिसाता ८ लाख ३६ हजार डलर छ ।

३. लुइस स्वारेज (एथ्लेटिको मड्रिड- प्रतिसाता ७ लाख ९३ हजार डलर)

एथ्लेटिको मड्रिडका स्ट्राइकर लुइस स्वारेज सबभन्दा धेरै बेसिक आम्दानी गर्ने खेलाडीको सूचीको तेस्रो स्थानमा छन् ।

पछिल्लो समय उनले निकै राम्रो प्रदर्शन पनि गरिरहेका छन् । उनकै प्रदर्शनको सहयोगमा एथ्लेटिको मड्रिडले यस वर्षको ला लिगा सान्टाडेरको उपाधि जितेको छ ।

४. एन्टोनी ग्रिजम्यान (बार्सिलोना-प्रतिसाता ७ लाख ९३ हजार डलर)

उनी एथ्लेटिको मड्रिड फर्किएका छन् । त्यसअघि मेस्सीले छाडेसँगै सबभन्दा धेरै बेसिक आम्दानी भएका १० खेलाडीको सूचीमा नी ग्रिजम्यान बार्सिलोनाका एक मात्र प्रतिनिधि थिए । उनको मोटो रकमको तलब बार्सिलोनाका लागि समस्या बनेको थियो ।

५. गेरेथ बेल (रियल मड्रिड-प्रतिसाता ६ लाख ९० हजार डलर)

पछिल्लो समय लोकप्रियता गुमाए पनि गेरेथ बेल अझै पनि धेरै कमाउने फुटबल खेलाडीको सूचीमा छन् ।

६. केलियन एम्बाप्पे (पीएसजी-प्रतिसाता ५ लाख ६६ हजार डलर)

एम्बाप्पे पीएसजीका प्रमुख तीन स्टारमध्ये सबभन्दा कम आम्दानी गर्ने खेलाडी हुन् । यद्यपि उनी अझै पनि सबभन्दा बढी आम्दानी गर्ने १० फुटबल खेलाडीको सूचीमा छन् ।

७. क्रिस्टियानो रोनाल्डो (म्यानचेस्टर युनाइटेड-प्रतिसाता ५ लाख ३१ हजार डलर)

पोर्चुगलका स्टार क्रिस्टियानो रोनाल्डो हालै मात्र युभेन्टसबाट म्यानचेस्टर युनाइटेड गएका हुन् । यो ट्रान्सफरसँगै बेसिक आम्दानीको हिसाबमा भने उनी अन्य खेलाडीभन्दा पछाडि परेका छन् । रोनाल्डोको आम्दानी म्यानचेस्टर युनाइटेडको तुलनामा युभेन्टसमा दोब्बरभन्दा धेरै थियो । यद्यपि उनी प्रिमियर लिगमा भने सबैभन्दा धेरै आम्दानी खेलाडीको रुपमा नै छन् ।

उनले स्पोन्सरसिप तथा अन्य आम्दानीबाट मात्र एक वर्षमा ४७ करोड डलर आम्दानी गर्छन् ।

८. केभिन डी ब्रुयेन (म्यानचेस्टर सिटी-५ लाख ३१ हजार डलर)

नयाँ सम्झौतासँगै बेल्जियमका मिडफिल्डर पनि प्रिमियर लिगमा सबभन्दा धेरै बेसिक आम्दानी भएको खेलाडी बन्न सफल भएका छन् । उनको प्रतिसाताको आम्दानी क्रिस्टियानो रोनाल्डोको जत्तिकै छ । म्यानचेस्टर सिटीको लागि यी खेलाडीले पनि निकै महत्वपूर्ण योगदान दिएका छन् ।

९. डेभिड डे गिया (म्यानचेस्टर युनाइटेड- प्रतिसाता ५ लाख १७ हजार डलर)

सबभन्दा धेरै बेसिक आम्दानी गर्ने उत्कृष्ट १० खेलाडीमा पर्ने गिया एक मात्र स्पेनिस खेलाडी हुन् ।

उनी सबैभन्दा धेरै आम्दानी गर्ने गोलकिपर पनि हुन् । एक दशकअघि एथ्लेटिको मड्रिडबाट म्यानचेस्टर युनाइटेड उनी क्लबको पहिलो रोजाइमा पर्दै आएका छन् ।

१०. रोबर्ट लेवान्डोस्की (बार्यन म्युनिख- प्रतिसाता ४ लाख ८३ हजार डलर)

यो सूचीमा बुन्डेसलिगाबाट प्रतिनिधित्व गर्ने लेवान्डोस्की एक मात्र खेलाडी हुन् । उनी २०२० मा फिताको पुरुष वर्ष खेलाडी बन्न सफल भएका थिए । उनले क्लबको लागि राम्रो प्रदर्शन गर्दै आएका छन् भने महत्वपूर्ण उपाधि पनि जिताएका छन् ।

मार्काबाट