नागरिक रक्षा अभ्यासको क्रममा रुसका आपतकाल व्यवस्था मन्त्रीको मृत्यु

२३ भदौ, काठमाडौं । रुसका आपतकाल व्यवस्था मन्त्री येभगेनी जिनिचेभको मृत्यु भएको छ ।

अन्तर्राष्ट्रिय सञ्चारमाध्यमहरुले उल्लेख गरे अनुसार आर्कटिक नागरिक रक्षा अभ्यासको क्रममा जिनिचेभको मृत्यु भएको हो । अभ्यासको क्रममा अर्का एकजनाको ज्यान बचाउने प्रयासमा ५५ वर्षीय जिनिचेभको मृत्यु भएको हो ।

रुसी ब्रोडकास्टर आरटीका प्रमुख मार्गरिता सिमोन्यानका अनुसार अन्तर्वार्ताको क्रममा पहाडबाट क्यामेराम्यान खसेका थिए । उनी क्यामेराम्यान पानीमा खसेसँगै उनलाई बचाउन जिनिचेभ पनि हाम फालेका थिए तर उनी पहाडमा बाहिर निस्किएको चट्टानमा ठोक्किएका थिए । त्यसलगत्तै उनको मृत्यु भएको हो । समाचारमा उल्लेख गरिएअनुसार पानीमा खसेका क्यामेराम्यानको पनि मृत्यु भएको छ ।

जिनिचेभ सन् २०१८ देखि रुसको आपतकाल व्यवस्था मन्त्रीको रुपमा रहेका थिए । उनी राष्ट्रपति भ्लादिमिर पुटिनको सुरक्षा व्यवस्थाका प्रमुख सदस्य पनि रहँदै आएका थिए ।

रुसी सञ्चारमाध्यमका अनुसार रुसको क्रास्नोयास्र्क क्षेत्रमा उक्त अभ्यास भइरहेको थियो । आर्कटिक क्षेत्रमा संकट समाधानको लागि राष्ट्रपति पुटिनको निर्देशनअनुसार नै उक्त अभ्यासको आयोजना गरिएको थियो । यो अभ्यासमा ६ हजार विशेषज्ञहरु सहभागी थिए ।

एजेन्सीहरुको सहयोगमा