सैनिक स्वास्थ्य विज्ञान प्रतिष्ठानमा अध्ययनरत एक विद्यार्थी बेपत्ता

११ कात्तिक, काठमाडौं । नेपाली सेनाको स्वास्थ्य विज्ञान प्रतिष्ठानका एक जना विद्यार्थी बेपत्ता भएका छन् । दैलेखको गराँस गाउँपालिका घर भएका २५ वर्षीय राजेश शाही १७ भदौदेखि बेपत्ता भएका हुन् ।

काठमाडौं प्रहरी परिसर, टेकुमा शाहीको खोजतलासका लागि निवेदन आएको एसएसपी अशोक सिंहले बताए । उनले भने, ‘प्रहरीले उनको खोजी कार्य जारी राखेको छ ।’

उनको परिवारले एमबीबीएस पढ्दै गरेको छोरा होस्टलबाटै हराएको बताएको छ । तर नेपाली सेनाले चाहिँ उनी होस्टलबाट बाहिर निस्किएको देखिएको भनेको छ । सैनिक प्रवक्ता सन्तोष बल्लभ पौडेलले भने, ‘विस्तृत बुझ्न मैले पनि रिपोर्ट मगाएको छु, प्रहरीसँग समन्वय भइरहेको छ ।’