१८ कात्तिक, काठमाडौं । बार्सिलोनाका पूर्वकप्तान जाभी अब प्रशिक्षक बन्ने भएका छन् । हाल जाभी प्रशिक्षक रहेको कतारी क्लब अल सादले जाभी बार्सिलोना जाने पक्का भएको जनाएको छ ।
अब उनले बर्खास्तीमा परेका रोनाल्ड कोम्यानको स्थान लिनेछन् । कोम्यान बर्खास्तीमा परेपछि बार्सिलोनाका पदाधिकारीहरु जाभीसँग कुरा गर्न कतार पुगेका थिए ।
जाभीले केही दिनअघि नै बार्सिलोना संकटमा रहेको र आफूले जान चाहेको जानकारी गराएको र त्यसमा आफूहरुले नरोक्ने निर्णय गरेको अल सादले जनाएको छ ।
बार्सिलोनाले जाभीका लागि ५ मिलियन युरो रिलिज मूल्य तिर्ने सम्झौता गरेको जनाइएको छ । साथै अल सादले जाभीलाई सधैँ क्लबमा स्वागत रहेको पनि जनाएको छ । जाभी २०१९ देखि अल सादको प्रशिक्षक छन् ।
४१ वर्षीय जाभीले खेलाडीको रुपमा बार्सिलोनामा ५०० भन्दा बढी खेल खेलेका छन् । उनले १७ सिजन क्लबमा बिताउँदा १५ मुख्य उपाधि जितेका थिए ।
प्रतिक्रिया 4