१७ मंसिर, काठमाडौं । नेपाली चलचित्रको पर्दामा थुप्रै पटक समाज र राष्ट्रलाई बदल्नका लागि नायकको अवतारमा देखिएकी अभिनेत्री रेखा थापा यतिबेला नयाँ अभियानमा लागेकी छन् । रेखाले चलचित्र क्षेत्रको करिअर उत्कर्षमा पुगिरहेको समयमा राजनीतिक यात्रालाई अगाडि बढाउन नखोजेकी होइनन् । तर, विविध कारणले उनको राजनीतिक करिअर अगाडि बढ्न सकेन ।
रेखा अब भने राष्ट्रिय प्रजातन्त्र पार्टीबाट राजनीतिक जीवनलाई अगाडि बढाउने सोचमा छिन् । अभिनेत्री थापा राप्रपाको भृकुटीमण्डमा जारी महाधिवेशनमा महामन्त्री पदमा उठेकी छन् । अध्यक्ष पदका उम्मेदवार राजेन्द्र लिङ्देनको प्यानलबाट रेखाले महिला महामन्त्री पदमा उम्मेदवारी दिएकी हुन् । रेखा शुक्रबार दिनभर नै पार्टीका प्रतिनिधिहरुसँग भोट माग्न व्यस्त देखिइन् ।
राजनीतिमा युवाहरु आउनुपर्छ भन्ने सोचका साथ रेखा लिङ्देनको प्यानलबाट महामन्त्रीको उम्मेदवार बनेकी छन् ।
चलचित्र निर्माण गरेपछि दर्शकलाई हेरिदिन आग्रह गर्दै देश दौडाहा हुन्थिन् रेखा कुनै बेला । तर, यतिबेला उनको जीवनको कोर्स फेरिएकोे छ । शनिबार राप्रपाको नयाँ नेतृत्वका लागि निर्वाचन हुँदैछ ।
तस्वीर : चन्द्र बहादुर आले
प्रतिक्रिया 4