वीपी प्रतिष्ठानको पदाधिकारीको हैसियतमा काम गर्न डा. यादव धरानमा, भोलिदेखि काममा लाग्ने

१० माघ, काठमाडौं । वीपी कोइराला स्वास्थ्य विज्ञान प्रतिष्ठानका पदाधिकारीहरुको हैसियतमा काम गर्न स्वास्थ्य तथा जनसंख्या मन्त्रालयका प्रमुख विशेषज्ञ डा. श्याम सुन्दर यादव सोमबार धरान पुगेका छन् ।

स्वास्थ्य मन्त्रालयले डा. यादवलाई प्रतिष्ठानमा जिम्मेवारी दिनका लागि मन्त्रिपरिषद्मा सिफारिस गरेको थियो । मन्त्रीपरिषद्को निर्णयले डा. यादवलाई प्रतिष्ठानको अस्पताल र ऐकेडेमीको आर्थिक तथा प्रशासनिक क्षेत्र जिम्मेवारी दिएको छ । तत्काल उपकुलपति डा. ज्ञानेन्द्र गिरी लगायतका अन्य पदाधिकारीलाई काममा रोक लगाएको छ ।

डा. यादवले धरान पुगेलगत्तै ऐकेडेमी तर्फको विभिन्न विभाग र प्रतिष्ठान शुद्धिकरण अभियानमा लागेका कर्मचारी छलफल भएको बताए । ‘आज विभिन्न विभागका प्रमुखसँग छलफल गरेको छु । भोलिदेखि हाजिर गरेर काम अगाडी बढाउने छु,’ डा. यादवले भने ।

‘सरकारले प्रतिष्ठानको अस्पताल र ऐकेडेमीको आर्थिक तथा प्रशासनिक क्षेत्रको जिम्मेवारी दिएको भन्दै डा. यादवले प्रतिष्ठानमा भएका बेथेति सुधारमा लाग्ने बताए ।

‘अस्पतालबाट गुणस्तरीय सेवा दिनका लागि वातावरण तय गर्छु । त्यसका साथै विद्यार्थीको पठन–पाठनलाई निरन्तरता दिन्छु,’ डा. यादवले अनलाइनखबरसँग भने , ‘ चाडैं सिनेट बसाउने छु । यो नै निकासको ठूलो योजना हो ।’

प्रतिष्ठानमा सुधारको माग गर्दै लामो समयदेखि जारी आन्दोलनमा उपकुलपति डा. ज्ञानेन्द्र गिरी, रजिस्ट्रार डा. मोहनचन्द्र रेग्मी, रेक्टर डा. गुरु खनाल र निर्देशक डा. गौरीशकंर शाहलाई बर्खास्त गर्नुपर्ने आन्दोलनरत चिकित्सक तथा कर्मचारीले माग गर्दै आएका छन् । उपकुलपति डा. गिरी लगायत अन्य पदाधिकारीमाथि अनियमितता र भ्रष्टाचारको आरोप लागेको छ ।