२३ फागुन, काठमाडौं । अखिल नेपाल फुटबल संघ एन्फाको आयोजनामा भइरहेको शहीद स्मारक बी डिभिजन लिगमा १४ खेलमै ५० गोल भएको छ ।
१४ क्लब सहभागी लिगमा सुरुको दुई चरणको खेल सकिँदा नै ५० गोलको आँकडा पुगेको हो । लिगमा अहिलेसम्म चर्च ब्वाईज युनाइटेड सर्वाधिक ७ गोल गरेको छ भने मध्यपुर युथ एसोसियसन, श्रीकुमारी क्लब तथा सामाजिक युथ क्लबले ५/५ गोल गरेका छन् ।
अहिलेसम्म लिगमा १३ खेलमा गोल हुँदा बाँसबारी क्लब र टुसाल युथ क्लबीचको खेल मात्रै गोलरहित बराबरीमा सकिएको थियो ।
चर्च ब्वाइजमा आशिष चापागाईँ ५ गोलसहित सर्वाधिक गोल गर्नेमा शीर्षस्थानमा छन् । उनले पहिलो खेलमा टुसाल युथ क्लबविरुद्ध ह्याट्रिक गरेका थिए भने खुमलटार युथ क्लब विरुद्ध २ गोल गरेका थिए ।
चर्च ब्वाईज र श्री भगवती क्लबले लगातार दुई खेल जितेका छन् । समान ६ अंक भए पनि गोलअन्तरका आधारमा चर्च ब्वाइज पहिलो स्थानमा छ ।
बी डिभिजन लिगबाट शीर्ष दुई टिम ए डिभिजनमा बढुवा हुनेछन् भने पुछारका दुई क्लब सी डिभिजनमा घटुवा हुनेछन् ।
प्रतिक्रिया 4