२५ चैत, काठमाडौं । जनवरीमा ४५ मिलियन युरोमा लिभरपुलमा आबद्ध भएका कोलम्बियन फरवार्ड लुइज डियज क्लबका लागि भाग्यशाली सावित भएका छन् ।
टोटनहम, चेल्सी र लेसिस्टर सिटीसँग हार व्यहोरेपछि लिभरपुलले जनवरीमा लुइजलाई ल्याउने फैसला गरेको थियो ।
‘समरमा खेलाडी अनुबन्ध गर्ने हो भने जनवरी अत्यधिक उपयुक्त समय हो, लुइजको हकमा पनि त्यहि भयो’, लिभरपुलका प्रशिक्षक जर्जेन क्लोपले भने, ‘उनी उत्कृष्ट खेलाडी हुन् । हामी जस्तो खेलाडी चाहन्थ्यौं उनी त्यसमा खरो उत्रन सके ।’
च्याम्पियन्स लिगको क्वाटर फाइनलमा बेनफिकाका समर्थकले लुइजलाई प्रतिकुल वातावरण सिर्जना गरे पनि उनले लिभरपुलका लागि उत्कृष्ट प्रदर्शन गरेका थिए ।
लिभरपुलले बेनफिकाविरुद्ध ३–१ को जित निकालेपछि प्रशिक्षक क्लोप निकै खुसी देखिन्थे । उनले खेलपछि लुइजको खुलेर प्रशंशा गरे । क्लोपले भने, ‘उनी विश्वका उत्कृष्ट खेलाडी हुन् । लुइजसँग काम गर्न पाउँदा म एकदमै खुसी छ ।’ उनले जनवरीमा लुइजलाई लिभरपुलमा अनुबन्ध गर्नु निकै राम्रो निर्णय रहेको बताएका छन् ।
लुइजले लिभरपुलमा अनुबन्ध भएपछि ३ गोल र एक असिस्ट गरेका छन् । उनको आगमन पश्चात लिभरपुलले १३ खेलमा जित, एक खेल बराबरी र एक खेलमा मात्र हार बेहोरेको छ । कराबाओ कप जित्नु, एफए कपको सेमिफाइनलमा पुग्नु, प्रिमियर लिगमा म्यानचेस्टर सिटीसँग १ अंकको मात्र भिन्नता कायम गर्नु उनको आगमन पश्चात लिभरपुलले पाएको सफलता हो ।
‘आश गरेको जस्तै खेलाडी पाउनु र उनको प्रदर्शन पनि आश गरे अनुरुप हुनु निकै राम्रो पक्ष हो’, क्लोपले भने, ‘जुइजलाई प्रशिक्षणमा देख्नु र पिचमा उतारिसकेपछि उनको प्रदर्शन निकै फरक हुने गदर्छ ।’ लुइजले नयाँ क्लबमा खेल्दा पनि एकदमै सहजता पूर्वक खेल्ने कारणले पनि उनीसँग काम गर्न सहज भएको क्लोपले बताए ।
प्रतिक्रिया 4