+
+

नेपालगञ्जको नेतृत्वमा कुरा नमिल्दा सत्ता गठबन्धनको बैठक लम्बियो

अनलाइनखबर अनलाइनखबर
२०७९ वैशाख ७ गते १५:३५

७ वैशाख, काठमाडौं । अधिकांश महानगरपालिका र उपमहानगरपालिकाको नेतृत्व भागवण्डा टुंग्याएको सत्तारुढ गठबन्धनले नेपालगञ्ज उपमहानगरपालिकाको नेतृत्वको विवाद मिलाउन नसक्दा बैठक लम्बिएको छ ।

बुधबार प्रधानमन्त्रीको सरकारी निवास बालुवाटारमा बसेको सत्तारुढ गठबन्धनको बैठकमा नेपालगञ्जको नेतृत्व नेपाली कांग्रेस र जनता समाजवादी पार्टीले दाबी गरेपछि सहमति हुन नसकेको नेताहरुले बताएका छन् ।

मंगलबार राति ९ वटा उपमहानगरपालिकाको नेतृत्वको भागवण्डा टुंग्याएको सत्तारुढ गठबन्धनमा जनकपुर र नेपालगञ्जमा भने विवाद थियो । बुधबार जनकपुर उपमहानगरपालिका जनता समाजवादी पार्टीले लिने सहमति भएको बैठकमा सहभागी एकीकृत समाजवादीका उपमहासचिव विजय पौडेलले बताए । तर नेपालगञ्जमा भने कांग्रेस र जसपा दुबैले दाबी छाडेका छैनन् ।

‘अरु सबै मिलिसक्यो, नेपालगञ्को जबारेमा कुरा अड्किएको छ,’ पौडेलले अनलाइनखबरसँग भने, ‘जसपाले नेपालगञ्ज नछाड्न नमान्दा कांग्रेस र जसपाबीचमा कुरो मिलेको छैन ।’ मंगलबारको बैठकमा नेपालगञ्ज नेपाली कांग्रेसलाई छाडेर जनकपुर लिन जसपा तयार भएको थियो । तर, नेपाली कांग्रेसले जनकपुर पनि छाड्न मानेको थिएन ।

बुधबारको बैठकमा जनकपुर छाड्न कांग्रेस तयार हुँदा जसपाले नेपालगञ्ज पनि छाड्न नमानेपछि लिखित सहमति सार्वजनिक गर्न ढिलाइ भइरहेको पौडलेले बताए।

गठबन्धनबीच स्थानीय तह निर्वाचनमा नेपाली कांग्रेसले काठमाडौं, ललितपुर र विराटनगर महानगरपालिकाको नेतृत्व लिने सहमति भएको छ । त्यस्तै माओवादी केन्द्रले भरतपुर, एकीकृत समाजवादीले पोखरा र जनता समाजवादीले वीरगंज महानगरपालिकाको नेतृत्व लिने सहमति भइसकेको छ ।

उपमहानगरपालिकातर्फ नेपाली कांग्रेसले धरान, इटहरी, कलैया, तुलसीपुर, बुटवल र धनगढीको नेतृत्व लिने सहमति भइसकेको छ । त्यस्तै माओवादी केन्द्रले जितपुर–सिमरा र घोराही, एकीकृत समाजवादीले हेटौंडा उपमहानगरपालिकाको नेतृत्व लिने सहमति पनि भइसकेको नेताहरुले बताएका छन् ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?