संघ र प्रदेशको चुनावमा गठबन्धन गर्न झन् सजिलो हुन्छ : माधव नेपाल

५ असार, काठमाडौं । नेकपा एकीकृत समाजवादीका अध्यक्ष माधवकुमार नेपालले सत्तारुढ दलबीच स्थानीय तहको निर्वाचनमा भन्दा प्रतिनिधिसभा र प्रदेशसभाा निर्वाचनमा गठबन्धन गर्न सहज हुने बताएका छन् ।

आइतबार विभिन्न सञ्चार माध्यमका सम्पादकहरुसँगको छलफलमा अध्यक्ष नेपालले स्थानीय तहमा गठबन्धन बढी पेचिलो भएको, तर प्रतिनिधिसभा र प्रदेशसभामा तुलनात्मक रुपमा सजिलो हुने बताएका हुन् ।

‘गठबन्धन गर्न स्थानीय तहमा बढी पेचिलो भयो’ उनले भने, ‘तुलनात्मक रुपमा माथि सजिलो छ । किनभने प्रतिनिधिसभामा १६५ र प्रदेशसभामा ३३० सिट छ ।’
अध्यक्ष नेपालले आगामी प्रतिनिधिसभा र प्रदेशसभा निर्वाचनसम्म अहिलेकै सत्तारुढ दलबीच गठबन्धन हुने बताए ।

‘अहिलेको निर्वाचन प्रणालीले नै एक भन्दा बढी पार्टी मिलेर सरकार बनाउनुपर्ने दिशातर्फ मुलुकको राजनीति अघि बढिरहेको छ’ उनले भने, ‘आगामी चुनावसम्म गठबन्धन कायम रहन्छ नै त्यसपछि पनि अघि बढाएर लानुपर्ने आवश्यकता छ ।’

चुनावपछि पनि गठबन्धन अघि बढाउने विषयमा दलहरुबीच छलफल भइरहेको उनको भनाइ छ ।

नेकपा एमालेले संसद विघटन गरेकामा गल्ती महसुस नगरेकाले तत्काल तालमेल वा गठबन्धन हुने सम्भावना नरहेको पनि अध्यक्ष नेपालले बताए ।

‘त्यो पक्षले आफ्नो गल्ती कमजोरी कति महसुस गरेको छ ? त्यो कोणबाट हेर्दा कहिँ पनि रियलाइजेसन देखिएन, जे गरियो गज्जब गरियो भन्ने देखिन्छ’ उनले भने ।