एकीकृत बजार अनुगमन : पहिलो दिन २४ फर्मलाई जरीवाना

१९ असार, काठमाडौं । सरकारले सुरु गरेको एकै पटक देशव्यापी अनुगमनको पहिलो दिन वाणिज्य, आपूर्ति तथा उपभोक्ता संरक्षण विभागले ८४ वटा व्यापारिक फर्मको अनुगमन गरेको छ ।

सरकारी नियकाबीच आन्तरिक समन्वयमा आधारमा शुक्रबार बिहान ११ बजेदेखि देशभरका एकीकृत अनुगमन गरेको विभागले जनाएको छ ।

देशभरका सबै सरकारी नियकाले बजार अनुगमन गरेको भएपनि नतिजा भने आइ नसकेको महानिर्देशक लिलाप्रसाद शर्माले बताए ।

विभागको केन्द्रीय र देशभरका सबै कार्यालयबाट गरिएको अनुगमनमा २४ वटा फर्मलाई जरीवाना गरिएको महानिर्देशक शर्माले जानकारी दिए ।

यस्तै ८ वटा फर्मबाट एक लाख ५१ हजार रुपैयाँ बराबरको वस्तु नष्ट गरिएको छ भने २० वटा फर्मलाई स्पष्टीकरण सोधिएको विभागले जनाएको छ ।

खाद्यान्न, डेरी, फर्मेसी, सर्जिकल सप्लायर्स, होटल, डेरी, खानेतेल र लत्ता कपडामा अनुगमन गरिएको विभागले जनाएको छ ।