२४ भदौ, काठमाडौं । नवौं राष्ट्रिय खेलकुद अन्तर्गत पुरुष क्रिकेट बिहीबारदेखि काठमाडौंमा सुरु भयो । नवौं राष्ट्रिय असोज २८ देखि कात्तिक ३ गतेसम्म गण्डकी प्रदेशमा आयोजना गर्ने तय भएपनि नेपाल टी२० लिगसँग मिति जुधेकाले पुरुष क्रिकेट एक महिनाभन्दा अघि नै काठमाडौंमा गरिएको हो ।
तर निरन्तरको वर्षाले गर्दा क्रिकेट खेल भने प्रभावित बनेको छ । पहिलो दिनमै तय गरिएका चारमध्ये तीन खेल हुन सकेनन् । एक खेल पनि ६–६ ओभरमा घटाएर खेलाइएको थियो ।
शुक्रबार पनि उस्तै समस्या देखियो । नेपाल पुलिस र मधेश प्रदेशबीच तय भएको खेल पहिलो टस नै नभई रद्द भएको छ । वर्षाका कारण मुलपानीमा मैदानमा पानी जमेपछि खेल रद्द गरिएको हो ।
मधेश प्रदेशको लगातार दोस्रो खेल वर्षाका कारण रद्ध भएको हो । यसअघि बिहीबार मधेश प्रदेश र गण्डकी प्रदेशबीचको खेल पनि रद्द भएको थियो ।
यस्तै त्रिवि मैदान पनि भिजेकाले बिहानको खेल ढिला सुरु भयो । एपीएफ र एनआरएनएबीचको खेलको टस पनि ढिला भएको थियो ।
एनआरएनएले टस जितेर ब्याटिङ गरेको थियो । तर एनआरएनएले १३.३ ओभरमा २ विकेट गुमाएर १२० रन बनाउँदा फेरि वर्षा बाधक बन्यो । एनएआरएनएका कप्तान सुनाम गौतम ४५ र पृथु बास्कोटा २६ रनमा खेलिरहेका थिए । तर खेलको नतिजा आउन सकेन र दुवै टिमले अंक बाँडे ।
एनआरएनएले पहिलो खेलमा सुदूरपश्चिम प्रदेशलाई १२ रनले हराएर विजयी सुरुवात गरेको थियो । समूह ‘बी’ मा दुई खेलपछि एनआरएनए ३ अंकसहित शीर्ष स्थानमा छ । एपीएफको १ अंक छ ।
शुक्रबारै त्रिवि मैदानमा सुदूरपश्चिम र बागमती प्रदेश तथा त्रिभुवन आर्मी र कर्णाली प्रदेशबीच खेल हुने तय छ ।
प्रतिक्रिया 4