तिहार दैलोमै आइसक्यो, फूलदेखि फलफूलसम्म, दियोदेखि मैनबत्तीसम्म, रंगी-बिरंगी टीका सामग्रीदेखि सेलरोटी र अनर्सासम्मले बजारमा कब्जा जमाउन थालिसकेका छन् ।
यी सबैकाबीच युवाहरु भने तिहारको माहोललाई रोमाञ्चक बनाउने पटाकाको जोहो गर्नमा जुटेका छन् । यद्यपि, तिहारमा पटाका पड्काउनु जिउ-ज्यानकै जोखिम हुुने भन्दै सरकारले हरेक वर्ष तिहारमा पटाका पड्काउन समेत निषेध गर्दै आएको छ ।
किनकि, पटाकामा हानिकारक रसायनहरुको प्रयोग गरिएको हुन्छ । मध्यरातसम्म पटाका पड्काउँदा त्यसले हाम्रो पर्यावरणलाई नै हानि पुर्याउँछ । अरु के जोखिम हुनसक्छन् त ?
जनावरहरूलाई असर
पड्काको आवाज र उज्यालोले घरपालुवा जनावर, चराचुरुंगी र अन्य वन्यजन्तुहरू त्रसित हुन्छन् । खासरगरी कुकुरको संवेदनशील कानले ठूलो आवाज सहन सक्दैन, जसले गर्दा उनीहरू भाग्ने र लुक्ने प्रयास गर्छन् । यिनीहरू त्रसित र आक्रमक हुनसक्छन् । पटकाले अन्य पशुपंक्षीको पनि आयु र प्रजनन क्षमतामा असर गर्छ ।
शारीरिक चोटपटक
गलत तरिकाले पड्का पड्काउँदा हात, आँखा वा शरीरका अन्य भागमा जल्ने वा गम्भीर चोट लाग्न सक्छ। यसलाई नियन्त्रण गर्नुपर्छ किनभने यस्ता चोटले स्थायी अशक्तता वा दृष्टि गुम्ने जोखिम हुन्छ।
ध्वनि प्रदूषण
पड्काको ठूलो आवाजले कानमा समस्या, तनाव वा साना बालबालिका र वृद्धवृद्धालाई डर उत्पन्न गर्छ। यसलाई रोक्नु जरूरी छ किनभने यसले मानसिक स्वास्थ्यमा नकारात्मक असर पार्छ र समुदायमा अशान्ति फैलाउँछ।
वायु प्रदूषण
पड्काबाट निस्कने धुवाँ र रसायनले वायु प्रदूषण बढाउँछ, जसले श्वासप्रश्वाससम्बन्धी रोगहरू निम्त्याउँछ। यो रोक्नु आवश्यक छ किनभने स्वच्छ हावाको अभावमा दीर्घकालीन स्वास्थ्य समस्याहरू बढ्छन्।
