रुम फ्रेसनरले कोठामा मिठो सुगन्ध दिन्छ, तर यसको प्रयोगसँगै केही रासायनिक पदार्थ हावामा मिसिन सक्छन् । यसको असर उत्पादन, मात्रा, प्रयोग अवधि र कोठाको भेन्टिलेसनमा निर्भर हुन्छ ।
फ्रेसनरमा के हुन्छ ?
स्प्रे, प्लग–इन, अटोमेटिक स्प्रे, रिड डिफ्युजर, जेल तथा फ्रेगरन्स बिड्समा सुगन्धित रसायन, एसेंसियल आयल, सोल्भेन्टलगायत पदार्थ हुन्छन् । ‘नेचुरल’ वा ‘ग्रीन’ लेखिएको उत्पादन पनि रसायनरहित हुँदैन ।
सुगन्धसँगै प्रदूषक पनि
फ्रेसनरबाट निस्किएका केही सुगन्धित रसायन घरभित्रको ओजोनसँग प्रतिक्रिया गर्न सक्छन्। यस्तो प्रतिक्रियाबाट फर्माल्डिहाइड, सूक्ष्म कण र अन्य द्वितीयक प्रदूषक बन्न सक्ने सम्भावना हुन्छ ।
कसलाई बढी असर ?
सुगन्धप्रति संवेदनशील व्यक्तिमा रुम फ्रेसनरले टाउको दुख्ने, नाक–घाँटीमा जलन, खोकी, छाती कस्सिने वा सास फेर्न गाह्रो हुने समस्या निम्त्याउन सक्छ। दम भएका व्यक्तिले विशेष सावधानी अपनाउनुपर्छ ।
बालबालिकाबाट टाढा राख्नुहोस्
लिक्विड रिफिल, रिड डिफ्युजर, जेल तथा फ्रेगरन्स बिड्स बालबालिकाको पहुँचबाट टाढा राख्नुपर्छ । यस्ता पदार्थ निलेमा वा आँखामा परेमा स्वास्थ्य समस्या हुनसक्छ। प्रयोगपछि बोतल राम्ररी बन्द गर्नुहोस् ।
प्रयोग गर्दा के गर्ने ?
रुम फ्रेसनर कम मात्रामा प्रयोग गर्नुहोस् । एयरोसोललाई आगोबाट टाढा राख्नुहोस् र स्प्रे गरेपछि झ्यालढोका खोलेर हावा आवतजावत गराउनुहोस् । प्लग–इन पनि उल्लेखित निर्देशनअनुसार प्रयोग गर्नुहोस् ।
