भिटामिन डी हड्डी बलियो बनाउन र शरीरमा क्याल्सियमको सन्तुलन कायम राख्न आवश्यक हुन्छ। तर यसको कमी पूरा गर्ने नाममा जथाभावी चक्की खानु हानिकारक हुन सक्छ। उच्च मात्राका सप्लिमेन्ट लामो समय सेवन गर्दा रगतमा क्याल्सियम बढेर मिर्गौलासहित शरीरका विभिन्न अंगमा असर पर्न सक्छ ।
भिटामिन डी बढी हुँदा मिर्गौलामा कस्तो असर पर्छ ?
भिटामिन डीको अत्यधिक सेवनले रगतमा क्याल्सियमको मात्रा बढाउन सक्छ। यसले पिसाबमा क्याल्सियमको मात्रा बढाएर मिर्गौलामा पत्थरी बन्ने जोखिम बढाउन सक्छ ।
गम्भीर अवस्थामा मिर्गौलाको तन्तुमा क्याल्सियम जम्मा भएर यसको कार्यक्षमतामा समेत असर पर्न सक्छ। त्यसैले, चिकित्सकको सल्लाहबिना उच्च मात्रा सेवन गर्नु हुँदैन ।
बढी भिटामिन डी खाँदैमा हड्डी बलियो हुन्छ ?
भिटामिन डी हड्डीको स्वास्थ्यका लागि आवश्यक भए पनि बढी सेवन गर्दैमा हड्डी थप बलियो हुँदैन । एउटा अध्ययनमा वृद्ध महिलालाई वर्षमा एकपटक अत्यधिक मात्रा दिँदा लड्ने र हड्डी भाँचिने जोखिम बढेको पाइएको थियो ।
शरीरमा भिटामिन डीको कमी कसरी थाहा पाउने ?
शरीरमा भिटामिन डीको स्तर थाहा पाउन २५-हाइड्रोक्सी भिटामिन डी नामक रगत परीक्षण गरिन्छ। थकान वा हड्डी दुखाइ जस्ता लक्षणबाट मात्रै यसको कमी भएको निश्चित गर्न सकिँदैन । चिकित्सकले लक्षण, स्वास्थ्य अवस्था र कमीको जोखिम हेरेर परीक्षण आवश्यक छ कि छैन भन्ने निर्णय गर्छन् ।
घाम ताप्दा भिटामिन डी बढी भएर विषाक्तता हुन्छ ?
घाम शरीरमा भिटामिन डी उत्पादन हुने प्राकृतिक माध्यम हो । सामान्य अवस्थामा घाम तापेकै कारण भिटामिन डीको विषाक्तता हुँदैन । यस्तो समस्या प्रायः लामो समयसम्म अत्यधिक मात्रामा सप्लिमेन्ट सेवन गर्दा हुन्छ । त्यसैले, घामबाट भिटामिन डी पाइन्छ भन्दैमा चक्की पनि आवश्यकताभन्दा बढी खानु हुँदैन । 6. भिटामिन डी दैनिक कति मात्रामा आवश्यक पर्छ? सामान्यतया १९ देखि ७० वर्षका वयस्कलाई दैनिक ६०० आईयू र ७० वर्षभन्दा माथिकालाई ८०० आईयू भिटामिन डी आवश्यक हुन्छ। वयस्कका लागि दैनिक ४,००० आईयू अधिकतम सहन सकिने मात्रा मानिन्छ, नियमित सेवनको लक्ष्य होइन। कमीको उपचारमा चिकित्सकले निश्चित अवधिका लागि बढी मात्रा सिफारिस गर्न सक्छन्।
