२३औँ संस्करणको फिफा विश्वकप आज २९ जेठदेखि सुरु हुँदै छ। अमेरिका, क्यानडा र मेक्सिकोमा हुन लागेको विश्वकपमा पहिलोपटक ४८ टोली सहभागी हुँदै छन्। सन् १९३० देखि सुरु विश्वकपमा ४ टोली- केप भर्डे, कुराकाओ, जोर्डन र उज्वेकिस्तानले डेब्यु गर्दै छन्।

सहभागी ४८ टोलीलाई १२ वटा समूह (प्रत्येक समूहमा ४ टोली) मा विभाजन गरिएको छ। अघिल्ला संस्करणहरूमा 'अन्तिम १६' बाट नकआउट चरण सुरु हुन्थ्यो भने यसपटक 'अन्तिम ३२' को नयाँ नकआउट चरण थपिएको छ। लियोनेल मेस्सीको कप्तानीमा रहेको साविक विजेता अर्जेन्टिना आफ्नो उपाधि रक्षा गर्ने दाउमा मैदानमा उत्रिनेछ।

३९ दिनसम्म चल्ने यो विश्वकपमा १,२४८ खेलाडी हुनेछन्। उनीहरूले कुल १०४ खेल १६ रङ्गशालामा खेल्नेछन्। उनीहरूमध्ये ८९१ खेलाडीले पहिलोपटक विश्वकप खेलिरहेका हुनेछन्। यसपटक मैदानमा १७ वर्षीय गिल्बर्टो मोरादेखि ४३ वर्षीय क्रेग गोर्डनसम्म देखिनेछन्।

खेलभर जसैजसै खेलाडीहरूले मैदानमा बल गुडाउनेछन्, सिङ्गो पृथ्वीको धड्कन उसैगरी स्पन्दित हुनेछ। किनकि फुटबल विश्वलाई जोड्ने एउटा माध्यम बन्नेछ। अर्को अर्थमा विश्वकप सयौँको सपना, मिहिनेत, आँसु र संवेदनाहरूको महाकुम्भ तथा महाउत्सव हो।

यसपटक यही रौनकता थप्न उत्तर अमेरिका तयार भइसकेको छ। अब केही दिनभित्रै इतिहासहरू रचिनेछन्। कसैको वर्षौँको तपस्या पूरा हुनेछ- ४ साउन (जुलाई १९) मा अमेरिकाको न्युयोर्क/न्युजर्सीस्थित मेटलाइफ स्टेडियममा हुने फाइनल खेलसँगै । जितको उन्माद र हारको गरिमा, दुवैको जीवन्त चित्र यहाँ देख्न पाइनेछ।

यो इन्टरएक्टिभ भिजुअल स्टोरीमा स्क्रोल गरेर विश्वकपको रोमाञ्चक इतिहास, रेकर्ड र यसपटक चम्किन सक्ने खेलाडीहरूको विस्तृत तथ्याङ्क हेर्न सक्नुहुनेछ।