राति पटक–पटक उठेर पिसाब फेर्न जानुपर्छ ? पिसाबको धार पहिलेभन्दा कमजोर भएको छ ? धेरै पुरुषले उमेर बढेसँगै यस्ता समस्या सामान्य ठानेर बेवास्ता गर्छन् । तर यी लक्षणहरू प्रोस्टेट ग्रन्थी बढेको संकेत हुन सक्छन् । समयमै पहिचान र उपचार गरिएमा अधिकांश बिरामीले सामान्य जीवन बिताउन सक्छन् ।
१. पिसाबको धार कमजोर हुनु
पहिलेजस्तो बलियो धारमा पिसाब नआएर सानो धारोमा वा थोपा–थोपा आउन थाल्छ भने यो प्रोस्टेट बढेको संकेत हुन सक्छ । कतिपय अवस्थामा पिसाब सुरु हुन नै केही समय लाग्छ वा धेरै बल लगाउनुपर्ने हुन्छ । यस्तो समस्या लगातार भइरहेमा यसलाई उमेरको सामान्य असर भनेर बेवास्ता नगरी चिकित्सकसँग परामर्श लिनु उचित हुन्छ।
२. राति पटक–पटक पिसाब लाग्नु
राति एकभन्दा बढी पटक उठेर पिसाब फेर्न जानुपर्छ भने यसलाई सामान्य नठान्नुहोस् । प्रोस्टेट बढ्दा मुत्राशय पूर्ण रूपमा खाली हुन नसक्दा बारम्बार पिसाब लाग्ने समस्या हुन्छ । यसले निद्रा बिगार्ने, दिनभरि थकान महसुस हुने र जीवनको गुणस्तरमा समेत असर पुर्याउन सक्छ ।
३. पिसाब गरिसकेपछि पनि बाँकी भएजस्तो लाग्नु
पिसाब गरिसकेपछि पनि मुत्राशय पूर्ण रूपमा खाली नभएको महसुस हुनु प्रोस्टेट बढेको महत्वपूर्ण संकेत हो । यस्तो अवस्थामा केही बेरमै फेरि पिसाब लाग्न सक्छ । लगातार यस्तो अनुभव भइरहेमा समयमै परीक्षण गराउनु आवश्यक हुन्छ ।
४. बारम्बार पिसाब लाग्नु
दिनभरि सामान्यभन्दा धेरै पटक शौचालय धाउनुपर्ने अवस्था पनि प्रोस्टेट बढेको कारण हुन सक्छ । मुत्राशयमा पिसाब बाँकी रहँदा बारम्बार पिसाब लाग्ने अनुभूति हुन्छ । यो समस्या दैनिक कामकाज र सामाजिक जीवनमा समेत असहज बन्न सक्छ ।
५. अचानक रोक्न नसकिने गरी पिसाब लाग्नु
एक्कासी अत्यधिक पिसाब लाग्ने र शौचालय पुग्नुअघि नै पिसाब चुहिने समस्या पनि प्रोस्टेट बढेको संकेत हुन सक्छ । यस्तो अवस्थाले आत्मविश्वास घटाउने मात्र होइन, दैनिक गतिविधिमा पनि असहजता सिर्जना गर्न सक्छ । बारम्बार यस्तो भएमा चिकित्सकीय जाँच आवश्यक हुन्छ ।
६. पिसाब गर्दा पोल्ने, दुख्ने वा रगत देखिनु
पिसाब गर्दा पोल्ने, दुख्ने वा पिसाबमा रगत देखिनु सामान्य लक्षण होइन । संक्रमण, प्रोस्टेटको समस्या वा अन्य गम्भीर रोगको संकेत हुन सक्छ । विशेषगरी रगत देखिएमा ढिलाइ नगरी युरोलोजिस्टसँग भेटेर आवश्यक परीक्षण गराउनुपर्छ।
