ध्यान अन्यत्र मोड्ने
मनपरेको कुरा नपाउँदा बच्चा जिद्दी गर्न थालेमा उसको ध्यान अन्यत्र मोड्न सकिन्छ । वरपरको रोचक कुरा देखाउने, खेल्न दिने वा अर्को गतिविधिमा सहभागी गराउने प्रयास गर्नुहोस् । वातावरण र ध्यान परिवर्तन भएपछि बच्चाको रिस, रोदन तथा जिद्दीपन विस्तारै कम हुन सक्छ ।
दैनिक दिनचर्या निश्चित गर्ने
खाना खाने, खेल्ने, पढ्ने र सुत्ने समय सकेसम्म निश्चित बनाउनुपर्छ । नियमित दिनचर्याले बच्चालाई स्थिरता र सुरक्षाको अनुभूति गराउँछ । कुन समयमा के गर्ने भन्ने थाहा हुँदा अचानक गतिविधि रोक्दा वा परिवर्तन गर्दा हुने विरोध, चिडचिडापन र जिद्दीपन पनि कम हुन्छ ।
आवश्यक पर्दा ‘हुँदैन’ भन्न सिक्ने
बच्चाले मागेका हरेक कुरा पूरा गर्नु आवश्यक हुँदैन । आवश्यक अवस्थामा ‘हुँदैन’ भन्नुपर्छ । तर रिसाएर कराउनुको सट्टा त्यसको कारण शान्त रूपमा बुझाउनुहोस् । सीमाको कारण स्पष्ट गर्दा बच्चाले नियम बुझ्न र अभिभावकको निर्णय सहज रूपमा स्वीकार गर्न विस्तारै सिक्छ ।
स–साना विकल्प दिने
उमेरअनुसार बच्चालाई स–साना निर्णय आफैं लिन दिने गर्नुहोस् । दुईवटा कपडामध्ये एउटा रोज्न दिने वा पहिले पढ्ने कि खेलिसकेपछि पढ्ने भनेर सोध्न सकिन्छ । सीमित र उचित विकल्प दिँदा बच्चाले आफ्नो कुरा राख्न पाउँछ र नियन्त्रणको अनुभूति हुँदा जिद्दी कम हुन सक्छ ।
राम्रो व्यवहारको प्रशंसा गर्ने
बच्चाले शान्त भएर आफ्नो कुरा राख्दा, नियम पालना गर्दा वा जिद्दी नगरी अभिभावकको कुरा बुझ्दा प्रशंसा गर्नुहोस् । ‘तिमीले राम्रोसँग आफ्नो कुरा भन्यौ’ जस्ता सकारात्मक शब्दले बच्चालाई प्रोत्साहन गर्छ । यसले राम्रो व्यवहार दोहोर्याउने बानी विकास गर्न पनि सहयोग पुर्याउँछ ।
