इतिहासका ५ प्रेम कथाहरू त्याग र समर्पणका जीवित उदाहरण हुन्, जसले समयसँगै झन् प्रसिद्धि पाएका छन् । कसैले प्रेमका लागि ज्यान त्यागे, कसैले राजगद्दी छोडे, कसैले प्रियजनको सम्झनामा अद्भुत स्मारक बनाए भने कसैले दूरीमा रहेर पनि प्रेमलाई जोगाइराखे । यही कारणले यी कथाहरू आज पनि संसारभर चर्चा हुने गर्छन् र पुस्तौँसम्म सम्झिइरहनेछन् ।
क्लियोपेट्रा र मार्क एन्टोनी
रोमन सेनापति मार्क एन्टोनी र इजिप्टकी रानी क्लियोपेट्राको भेट सुरुमा राजनीतिक उद्देश्यले भएको थियो, तर त्यो सम्बन्ध विस्तारै गहिरो प्रेममा बदलियो । उनीहरूको प्रेमले रोमन साम्राज्यभित्र तनाव बढायो र अन्ततः एक्टियमको युद्धको कारण बन्यो । युद्धमा पराजित भएपछि एन्टोनीले आत्महत्या गरे र क्लियोपेट्राले पनि सर्पको टोकाइबाट मृत्यु रोजिन् । उनीहरूको प्रेमले साम्राज्य ढाले पनि इतिहासमा अमर कथा बन्यो ।
शाहजहाँ र मुमताज महल
मुगल सम्राट शाहजहाँ र उनकी प्रिय पत्नी मुमताज महलबीचको प्रेम इतिहासकै सबैभन्दा सुन्दर कथामध्ये एक मानिन्छ । मुमताजको मृत्यु भएपछि शाहजहाँ गहिरो शोकमा डुबे र उनले आफ्नो प्रेमलाई सधैंका लागि जोगाइराख्न ताजमहल निर्माण गर्ने निर्णय गरे । २२ वर्ष लगाएर बनाइएको यो भव्य स्मारक आज पनि प्रेमको प्रतीकका रूपमा विश्वभर चिनिन्छ ।
डवर्ड र वालिस सिम्पसन
ब्रिटेनका राजा एडवर्ड आठौंको प्रेमकथा आधुनिक इतिहासको सबैभन्दा ठूलो त्यागको उदाहरण हो । उनले अमेरिकी महिला वालिस सिम्पसनलाई प्रेम गरे, तर उनी सम्बन्धविच्छेद भएकी भएकाले राजपरिवार र चर्चले विवाह स्वीकारेन । यस्तो अवस्थामा एडवर्डले सिंहासनभन्दा प्रेम रोजे र १९३६ मा राजगद्दी त्यागे ।
नपोलियन र जोसेफिन
फ्रान्सका शक्तिशाली शासक नपोलियन बोनापार्ट र जोसेफिनबीचको प्रेम निकै गहिरो थियो, जसमा भावना, शक्ति र संघर्ष सबै मिसिएको थियो । उनीहरूले विवाह गरे तर जोसेफिनले सन्तान जन्माउन नसक्दा नपोलियनले साम्राज्यको भविष्यका लागि सम्बन्धविच्छेद गर्नुपर्यो ।
सम्बन्ध टुटे पनि उनले जीवनभर जोसेफिनलाई माया गरिरहे र उनको मृत्युमा अत्यन्त दुःखी भए । अन्तिम समयमा पनि जोसेफिनको नाम सम्झनुले यो प्रेम कति गहिरो थियो भन्ने देखाउँछ ।
अबेलार्ड र हेलोइस
दार्शनिक पिटर अबेलार्ड र उनकी विद्यार्थी हेलोइसबीचको प्रेम मध्ययुगकै सबैभन्दा अनौठो र बौद्धिक कथा हो । उनीहरूबीच गहिरो सम्बन्ध बन्यो, गुप्त विवाह भयो र सन्तान पनि जन्मियो, तर परिस्थितिले उनीहरूलाई अलग गरिदियो । अबेलार्डले भिक्षु जीवन रोजे भने हेलोइसले पनि आफ्नो बाटो सम्हालिन्, तर उनीहरूले पत्रमार्फत जीवनभर आफ्नो प्रेम व्यक्त गरिरहे । उनीहरूको कथा आज पनि प्रेम र समर्पणको अद्भुत उदाहरणका रूपमा पढिन्छ ।
