क्लब फुटबलमा रोनाल्डोको अर्को रेकर्ड, गरे ५०० औं गोल

२०७३ पुष १ गते १२:३५

क्लब फुटबलमा रोनाल्डोको अर्को रेकर्ड, गरे ५०० औं गोल

चौथो पटक बोलोन डि’ओरको उपाधि जितेकै साता रियल मडि्रडका पोचुगिज सुपरस्टार क्रिष्टियानो रोनाल्डोले क्लब फुटबलको अर्को महत्वपूर्ण कोशेढुंगा पार गरेका छन् ।

बिहीबार क्लब विश्वकपको सेमिफाइनलमा क्लव अमेरिकाबिरुद्ध रियललाई २-० को जित दिलाउने क्रममा रोनाल्डोले क्लब करिअरमा ५०० गोलको आंकडा पार गरेका छन् ।

खेलको अन्त्यतिर अल्भारो मोराटाको पासमा उनले गोल गरे । तर, गोलको खुसियाली मनाउन नपाउँदै रेफ्रीले भिडियो रिभ्यू मागेका थिए । रिभ्यूपछि उनको गोलले आधिकारिक मान्यता पायो ।

फिफाले पहिलो पटक आधिकारिक प्रतियोगितामा भिडियो रिभ्यूको व्यवस्था गरेको छ ।

यो गोलसँगै रोनाल्डो दुई फरक क्लबबाट क्लब विश्वकपमा गोल गर्ने पहिलो खेलाडी पनि बनेका छन् । उनले सन् २००८ मा म्यानचेस्टर युनाइटेडमा रहँदा गाम्बा ओसाकाबिरुद्ध गोल गरेका थिए ।

क्लब विश्वकपको उपाधिका लागि रियलले आगामी आइतबार जापनिज च्याम्पियन काशिमा एन्टलरसँग खेल्नेछ ।

३७७ गोलसहित रोनाल्डो रियल मडि्रडका अहिलेसम्मका सर्वाधिक गोलकर्ता हुन् । साथै उनले ११८ गोल म्यानचेस्टर युनाइटेडबाट गरेका थिए भने पहिलो क्लब स्पोर्टिङ लिस्बोनबाट ५ गोल गरेका थिए ।

उनले पोर्चुगलको राष्ट्रिय टोलीका लागि ६८ गोल गरेका छन् । करिअरकै ५००औं गोल भने उनले गत बर्ष माल्मोबिरुद्धको राष्ट्रिय टोलीको खेलमै पूरा गरेका थिए ।