अर्जेन्टिनी डिफेण्डर मार्टिनेज युनाइटेडमा अनुबन्धित

११ साउन, काठमाडौं । अर्जेन्टिनी डिफेण्डर लिसेन्द्रो मार्टिनेज ६७ मिलियन युरोमा नेदरल्याण्डको आयाक्सबाट इंग्लिस टोली म्यानचेस्टर युनाइटेडमा अनुबन्धित भएका छन् ।

युनाइटेडका प्रशिक्षक इरिक टेन हाग २४ वर्षीय यी खेलाडीलाई युनाइटेड भित्र्याउन इच्छुक थिए । जसलाई उनले २०१९ मा आयाक्समा अनुबन्धित गरेका थिए ।

मार्टिनेजले युनाइटेडसँग पाँच वर्षको सम्झौता गरेका छन् । उनी सन् २०२७ सम्म ओल्ड ट्राफोटमा रहनेछन् भने सम्झौताअनुसार एक वर्षको विकल्प पनि हुनेछ ।

‘यो महान फुटबल क्लबमा आउन पाउनु मेरा लागि सम्मानको कुरा हो,’ मार्टिनेजले भनेका छन्, ‘म यो क्षणका लागि मिहिनेत गरिरहेका थिएँ । अब अझै राम्रो गर्नका लागि प्रयासरत हुनेछु ।’

सन् २०१९ मा अर्जेन्टिनी क्लब डिफेन्सा जस्टिसियाबाट ६.३ मिलियन पाउण्डमा आयाक्स पुगेका उनले डच क्लबका लागि १२० खेल खेलेका छन् । सन् २०१९ मा अर्जेन्टिनाको सिनियर टिमबाट डेब्यू गरेयता उनले ७ खेल खेलेका छन् । उनी सन् २०२१ को कोपा अमेरिका विजेता टिमका सदस्यसमेत हुन् ।