पुलिसलाई हराउँदै मनाङ तेस्रो स्थानमा फर्कियो

काठमाडौं । साविक विजेता मनाङ मर्स्याङ्दी क्लब केही घण्टापछि नै सहिद स्मारक ए डिभिजन लिगको तेस्रो स्थानमा फर्किएको छ । लिग अन्तर्गत मंगलबार भएको खेलमा विभागीय टोली नेपाल पुलिस क्लबलाई २-० ले पराजित गर्दै मनाङले थ्री स्टारलाई अंक तालिकामा पछि पारेको हो ।

सातदोबाटोस्थित एन्फा कम्प्लेक्स मैदानमा भएको खेलमा मनाङका लागि विमल राना र अन्जन विष्टले पहिलो हाफमा गोल गरेका थिए । अन्तिम समयमा पुलिसका विशाल बस्नेतले रातो कार्ड खाएका थिए ।

खेलको ३१औं मिनेटमा विमल रानाले पुलिसका डिफेण्डर अन्जन राईको गल्तीमा गोल गर्दै मनाङलाई अग्रथा दिलाएका थिए । ४१औं मिनेटमा अन्जन विष्टले निशान सुब्बाको क्रसमा हेडमार्फत गोल गर्दै पहिलो हाफमै अग्रता दोब्बर पारे ।

दोस्रो हाफमा भने दुवै टोलीले गोल गर्न सकेनन् । ९०औं मिनेटमा विशालले मनाङका विमल रानालाई खराब फउल गरेपछि रेफ्री सुदीप पाण्डेले विशाललाई सिधै रातो कार्ड देखाएका थिए ।

जितपछि १२ खेलबाट २३ अंक जोड्दै मनाङ तेस्रो स्थानमा उक्लेको छ । समान खेलबाट २२ अंक जोडेको थ्री स्टार चौथोमै झरेको छ । थ्री स्टारले मंगलवारै एनआरटीलाई १-० ले पराजित गरेको थियो ।

साविक विजेता मनाङ यस पटक उपाधि रक्षा होडबाट बाहिरिसकेको छ । पुलिसलाई हराएपछि मनाङले शीर्ष चारमा रहने पक्का भएको छ । मनाङले अब अन्तिम खेलमा जावलाखेल युथ क्लबसंग खेल्नेछ । यस्तै पुलिसले फ्रेण्ड्स क्लबसँग खेल्नेछ ।

१२ खेलबाट १७ अंक रहेको पुलिसल छैटौँ स्थानमा छ । पुलिसले अब अन्तिम खेल जितेमा शीर्ष ६ मा रहेर लिग सकाउनेछ ।

पुलिसविरुद्ध गोल गरेका विमल र अन्जन दुवैले यस सिजनमा लिगमा गोल संख्या ६-६ पुर्‍याएका छन् । सर्वाधिक गोल गर्नेमा दुवै खेलाडी बर्मीका नवयुग श्रेष्ठसँगै संयुक्त रुपमा तेस्रो स्थानमा छन् । एपीएफका आशिष लामा ८ गोलसहित शीर्ष स्थानमा छन् भने ७ गोल गरेका च्यासलका सन्तोष साहुखल दोस्रो स्थानमा छन् ।