टी टकः ‘म त सोझी केटी, केटातिर नजर नै गएन’: अनिता

दुई दर्जन बढी गीतमा स्वर दिएकी छिन् गायिका अनिता चलाउनेले । उनको रुची आधुनिक गायनमा छ । तर, लोकदोहोरीमा पनि स्वर दिएकी छिन् । घर बर्दिया भएकाले पनि लोकगीतप्रति झुकाब भएको धारणा राख्ने अनिता आफ्नै गीतमा मात्रै मोडलिङ गर्छिन् । उनै गायिकासँग अनलाइनखबरले गरेको टी-टकः

बिहान कति बजे उठ्नुहुन्छ ?
म बिहान पाँच बजे उठ्छु । उठेपछि घरमै डेढ घण्टा रियाज गर्छु ।

चिया कति बजे पिउनुहुन्छ ?
चिया पिउँदा साँढे ७ जति हुन्छ । ग्यासटिक हुन्छ भनेर कालो चिया पिउँछु ।

ब्रेकफाष्ट ?
ब्रेकफाष्ट खासै हुन्न । बिहान नौ- साँढे नौ बजे खाना खान्छु ।

खाना कसले बनाउँछ ?
खाना प्रायः म आफैं बनाउँछु । तर, भाँडा माझ्ने कुरामा अल्छि छु । प्राय भाँडा दिदीले माझ्नु हुन्छ । म भने पकाउँछु मात्रै ।

दिदी बहिनीको ठाकठुक पनि त पर्दो हो ?
त्यस्तो हुँदैन । हामी दिदी बहिनी मिल्छौं ।

तपाईको आजको सेड्युल ?
बिहान ७ बजेदेखि, क्लास थियो भर्खर कोठामा आएँ । साँढे १ बजेपछि दुई घण्टा क्लास छ ।

दिनमा कतिजनासँग भेट हुन्छ ?
खास काम भएको बेलामा मात्रै हो । नत्र त्यस्तो धेरै मान्छेसँग भेट हुँदैन ।

फेसबुक कत्तिको चलाउनुहुन्छ ?
चलाउँछु । बेलुका प्रायः चलाउँछु ।

अहिलेसम्म कतिलाई ब्लक गर्नु भो होला ?
कति गरेँ कति । अनावश्यक म्यासेज गरेर सताउने र फोटोमा जे पायो त्यहि कमेन्ट गर्नेलाई ब्लक गरिदिन्छु ।

केटाहरुले स्कुलमा कत्तिको जिस्क्याए ?
तीनजनाको एउटा ग्रुुप थियो । स्कुल जाँदा आउँदा र स्कुलमै पनि जिस्क्याउथे । सार्‍है झोक चल्यो । मेजर इङ्लीस पढाउने सर निकै कडा हुनुहुन्थ्यो । उहाँलाई कम्प्लेन गरेँ । तीनै जनालाई सरले मुर्गा बनाउनु भयो ।

अहिले ति केटाहरुसँग भेट हुन्न ?
अहँ, काठमाडौ आएपछि भेट भएको छैन । त्यसपछि भेट हुँदा पनि बोलेनन् ।

तपाईले पनि त जिस्क्याउनु भो होला नि ?
अहँ म त सोझी केटी, केटा जिस्क्याउने तीर ध्यानै दिईनँ ।

प्रेम प्रस्ताब राख्नेहरु त आए होला ?
एउटा केटी मान्छेलाई त्यस्तो प्रस्ताब त स्कुल पढ्दादेखि नै आएको थियो । तर, मैले चासो दिईन ।

माेडलिङ पनि गर्नु भएको छ ?
मोडलिङप्रति त्यति धेरै रुची त छैन । तर, आफुले गाएको गीतमा मोडलिङ गर्नुपर्छ भनेर एउटा तीजको गीतमा पशुुपति शर्मा दाईसँग मोडलिङ गरेँ । आफ्नै केहि गीतमा मोडलिङ गर्ने विचारमा छु ।