घरेलु मैदानमा भ्यालेन्सियासँग बराबरीमा रोकियो रियल मड्रिड
१२ भदौ, काठमाडौं । साविक बिजेता रियल मड्रिडले स्पेनिस लालिगामा घरेलु मैदानमा भ्यालेन्सियासँग बराबरी खेल्दै अंब बाँडेको छ ।
सान्टियागो बर्नबाउमा भएको खेलमा मिडफिल्डर मार्को एसेन्सियोको शानदार प्रदर्शनबाट रियल हारबाट जोगियो । उसले भ्यालेन्सियालाई २-२ को बराबरीमा रोकेको हो ।
लालिगाको पहिलो खेलमा रातो कार्ड पाएर एक खेलको प्रतिबन्धमा परेका सर्जियो रामोसका कारण पहिलो रोजाइमा मौका पाएका एसेन्सियोले १०औं मिनेटमै शानदार गोलमार्फत घरेलु टिमलाई अग्रता दिलाएका थिए ।
तर, पाहुना टोली भ्यालेन्सियाका कार्लोस सोलेरले १८औं मिनेटमै रियलको अग्रता तोड्दै बराबरी गोल फर्काए । टोली लाटाको क्रसमा उनले गोल गरेका थिए ।
प्रतिबन्धमा रहेका सुपरस्टार रोनाल्डो विनाको रियल दोस्रो हाफमा पनि हावी भएको थियो । तर, भ्यालेन्सियाका लागि डेब्यू गरेका जेफ्री कान्डोगवियाले रियलका गोलकिपर केलोर नाभासलाई विट गर्दै ७७ औं मिनेटमा गोल गरेपछि रियलले घरेलु मैदानमा पछि परेको थियो ।
८३औं मिनेटमा एसेन्सियोले व्यक्तिगत दोस्रो र टिमका लागि बराबरी गोल गर्दै रियललाई घरमै हारबाट जोगाएका थिए ।
प्रतिक्रिया 4