बलेफी गाउँपालिकामा जिल्ला स्तरीय फुटबल सुरु
२२ पुस, सिन्धुपाल्चोक । सिन्धुपाल्चोकको बलेफी गाउँँपालिकाको आयोजनामा प्रथम जिल्ला स्तरीय खुला फुटबल प्रतियोगिता सुरु भएको छ ।
बसन्तपुर खेल मैदानमा आइतबारदेखि सुरु प्रतियोगितामा जिल्लाका १० स्थानीय तहको सहभागिता रहेको छ ।
प्रतियोगिताको प्रदेश सांसद सरेश नेपालले उद्घाटन गरेका थिए । प्रतियोगिताको उद्घाटन खेलमा बलेफी गाउँपालिकाले त्रिपुरासुन्दरी गाउँपालिकालाई २–० गोल अन्तरले पराजित गरेको छ । उद्घाटन खेलका म्यान अफ द म्याच बलेफी गाउँपालिकाकै अजय तामाङ घोषित भए ।
प्रतियोगितामा बलेफी, सुनकोशी, लिसंखुपाखर, भोटेकोशी, इन्द्रावती, हेलम्बु, त्रिपुरासुन्दरी गाउँपालिका र मेलम्ची, चौतारा र बाह्रविसे नगरपालिकाका सहभागी भएका छन् ।
प्रतियोगितामा प्रथम हुने टिमले नगद १ लाख र दोस्रो हुने टिमले ५० हजार रुपैयाँ नगद पुरस्कार पाउनेछन् । जनप्रतिनिधि आएपछि जिल्लामा स्थानीय तहले आयोजना गरेको यो पहिलो खेलकुद प्रतियोगिता हो ।
प्रतिक्रिया 4