फ्रेन्च स्ट्राइकर जिरुडले अन्तर्राष्ट्रिय फुटबलबाट सन्यास लिने
२०८१ जेठ ११ गते २०:१८ 
११ जेठ, काठमाडौं । एसी मिलानका फ्रेन्च स्ट्राइकर ओलिभर जिरुडले अन्तर्राष्ट्रिय फुटबलबाट सन्यास लिने घोषणा गरेका छन् ।
उनले युरोपियन च्याम्पियनसिप २०२४ आफ्नो अन्तिम प्रतियोगिता भएको बताएका हुन् ।
जिरुडले फ्रान्सका लागि १३१ खेल खेल्दै ५७ गोल गरेका छन् । उनी फ्रान्सका उच्च गोलकर्ताको सूचीमा छन् ।
२०१८ मा फ्रान्सले विश्वकप जित्दा उनी टिमको सदस्य थिए । जिरुडले कतार विश्वकप २०२२ मा ४ गोल गरेका थिए । २०२२ को विश्वकपमा फ्रान्स अर्जेन्टिनासँग पेनाल्टी सुटआउटमा पराजित हुँदै उपविजेता बनेको थियो ।
२०२४ युरो पश्चात भने जिरुड अमेरिकी शीर्ष डिभिजन लिग क्लब लस एन्जल्स एफसीमा जान सहमत भएका छन् । ३७ वर्षीय जिरुडले क्लबसँग १८ महिनाको लागि सम्झौतामा हस्ताक्षर गरेका हुन् ।
प्रतिक्रिया 4