२०७७ असार २६ गते ९:२० 
२६ असार, काठमाडौं । इटालियन सिरी ए अन्तर्गत पछिल्लो खेलमा तेस्रो स्थानको इन्टर भेरोनासँग बराबरीमा रोकिएको छ । भेरोनाको मैदानमा भएको खेलमा इन्टरले २-२ को बराबरी खेल्दै अंक बाँडेको हो ।
खेलमा एक गोलले पछि परेको इन्टरले लगातार दुई गोल गर्दै कुनै समय अग्रतासमेत लिएको थियो तर खेल सकिन ४ मिनेट अगाडि भेरोनाले गोल गरेपछि इन्टर अंक बाँड्न बाध्य भएको हो ।
घरेलु मैदानमा खेलको दोस्रो मिनेटमै डार्को लाजोभिकले गोल गर्द भेरोनालाई अग्रता दिलाएका थिए । पहिलो हाफमा भेरोनाले अग्रता कायम राखेपनि इन्टरले दोस्रो हाफको सुरुमै गोल फर्कायो ।
४९औं मिनेटमा इन्टरका एन्टोनिओ कान्ड्रेभाले बराबरी गोल फर्काए । ५५औं मिनेटमा भेरोनाका फेडेरिको डिमार्कोले आत्मघाती गोल गरेपछि इन्टरले २-१ को अग्रता बनायो । तर ८६औं मिनेटमा भेरोनाका मिकेल भेलोसले गरेपछि खेल २-२ को बराबरीमा सकिएको हो ।
बराबरीपछि इन्टरले तेस्रो स्थानमा उक्लने मौका गुमायो । इन्टरको ३१ खेलबाट ६५ अंक भएको छ । समान खेलबाट ६६ अंकसहित एटलान्टा तेस्रो स्थानमा छ । भेरोना ४३ अंकसहित नवौं स्थानमा छ ।
यस्तै अर्को खेलमा उडिनेसीले पुछारमा रहेको एसपीएललाई ३-० ले पराजित गरेको छ । जितपछि उडिनेसी ३१ खेलबाट ३५ अंक जोड्दै १४औं स्थानमा उक्लेको छ । १९ अंक मात्र रहेको एसपीएल रेलिगेसन जोगाउन संघर्षरत छ ।
प्रतिक्रिया 4