च्याउको गाउँ बन्यो बलम्बु, वर्षमा पौने अर्वको कारोबार

२१ पुस, काठमाडौं । देशभर उत्पादन हुने च्याउको ७३ प्रतिशत हिस्सा ओगटेको बलम्बु गाविसमा वाषिर्क ७५ करोड रुपैयाँको च्याउ कारोबार हुन्छ । नेपालमै पहिलो पटक व्यवसायिक च्याउखेती सुरु भएको थानकोटनजिकै बलम्बुका अधिकांश कृषकले यही पेसालाई जीवन धान्ने आधार बनाएका छन् । त्यसैले यो गाउँलाई ‘च्याउ गाउँ’ भनेर चिनिन्छ ।

बलम्बुका कृषकले ०३७ देखि गोब्रे र ०४१ देखि कन्ये च्याउको खेती गर्दै आएका छन् । स्थानीय ‘बलम्बु च्याउ सहकारी संस्था’का अनुसार यो क्षेत्रमा करिब ३ सय घरधुरीले ३ सय रोपनीभन्दा बढी जग्गामा च्याउखेती गरिरहेका छन् ।

‘हाम्रो प्रमुख पेसा भनेकै च्याउ उत्पादन हो, यसबाट पर्याप्त आम्दानीसमेत गरिरहेका छौं,’ सहकारीका उपाध्यक्ष सुमन महर्जन भन्छन्-‘हामी देशकै नमुना च्याउ उत्पादक गाउँको रुपमा स्थापित भएर आर्थिक विकासको हिस्सा बन्न लागिपरका छौं ।’ च्याउ उत्पादनलाई सहयोग गर्न बलम्बुमा सहकारी, अनुसन्धान केन्द्र तथा कम्पनीहरुसमेत सञ्चालनमा रहेको कारोबार दैनिकमा खबर छ ।

व्यवसायिक कीट विकास निर्देशनालयका अनुसार ६२ जिल्लामा विभिन्न थरीका करिब २५ लाख किलो च्याउ उत्पादन हुन्छ । त्यसको ७३ प्रतिशत अर्थात १८ लाख २५ हजार किलो च्याउ बलम्बुमै उमि्रन्छ । यहाँ कन्ये, गोब्रे, सिताकेलगायतका जातका च्याउको खेती हुने गरेको छ ।