कर्मचारीहरुलाई गुगल ट्रान्सलेट प्रयोग गर्न प्रतिबन्ध

भलै पूरै भर पर्न नसकिएला तर अप्ठेरो शव्द, वाक्यांश तथा वाक्यहरु एक भाषाबाट अर्को भाषामा अनुवाद गर्नका लागि गुगलको भाषा अनुवाद टूल गुगल ट्रान्सलेटको प्रयोग अधिकांसले गर्दछन् । तर अब भारतको महाराष्ट्रमा भने सरकारी कामकाजको सिलसिलामा कर्मचारीहरुले गुगल ट्रान्सलेटको प्रयोग गर्न नपाउने भएका छन् ।

महाराष्ट्र सरकारले आफ्ना अधिकारीहरु तथा कर्मचारीहरुलाई गुगल ट्रान्सलेट प्रयोगमा रोक लगाएको हो । सरकारले आधिकारिक सूचना जारी गर्दै भनेको छ की सरकारी कागजातको अनुवाद अन्य भाषाहरुमा गर्नका लागि गुगल ट्रान्सलेटको प्रयोग नगर्नुहोला ।

खासमा गत २७ अगष्टमा जारी एक सरकारी सर्कुलरलाई कर्मचारीहरुले गुगलबाट अनुवाद गरेका थिए । यसरी गुगलबाट अनुवाद गर्दा त्यो परिपत्रको आशय तथा अर्थ नै फरक परेको थियो । सोही कारण बुझाइमा फरक पर्दा सरकार निकै आलोचित बन्न पुगेको थियो । सोही कुराबाट सबक सिक्दै राज्यको सूचनाप्रविधि विभागले सरकारी रिजोलुसन जिआर जारी गर्दै सरकारी विभागहरुमा गुगल ट्रान्सलेटको प्रयोग नगर्न निर्देशन दिएको हो ।

यो निर्देशनमा लेखिएको छ: सरकारको आधिकारिक वेबसाइटबाट डाउनलोड गरिएका सर्कुलर तथा जिआरका लागि सम्बनिधत व्यक्तिलाई नै जिम्मेवार मानिनेछ । सम्बन्धित अधिकारीहरुले सरकारी कागजात अनुवाद गर्दा निकै सावधानी अपनाउनुपर्ने र सरकारी वेबसाइटमा कागजात अपलोड गर्नुभन्दा पहिले माथिल्लो अधिकारीबाट परीक्षण गराउनुपर्ने पनि निर्देशनमा उल्लेख छ ।

स्मरण रहोस् गुगल ट्रानसलेट टूल विश्वभर नै प्रयोगमा छ तर कहिलेकाहीँयसले बडो अनौठो अनुवाद गरिदिन्छ । यसले शव्दको जस्ताको तस्तै अनुवाद अर्थात् शाव्दिक अर्थमा अनुवादा गरिदिन्छ जसका कारण वाक्यको भाव नै बदलिन्छ ।