गहना किन्ने हो ? जेम्स एण्ड ज्वेलरी एक्स्पोमा जानोस्

८ जेठ, काठमाडौं । राजधानीको दरबारमार्गस्थित पाँचतारे होटल याक एण्ड यतीमा जेम्स एण्ड ज्वेलरी एक्स्पो चलिरहेको छ । एक्स्पोमा गहनाका पारखीहरुको भिडभाड लागेको छ ।

एक्स्पोमा न्यूनतम ८/१० हजार रुपैयाँदेखि २० लाख रुपैयाँसम्मका गहनाहरु प्रर्दशनीमा राखिएको छ । एक्स्पोमा गहनामात्र होइन, सुनचाँदीको टोपी, सुन लेपन गरिएको घडी लगायतका वस्तुहरु पनि रहेका छन् । जसले अवलोकनकर्ताको ध्यान खिच्न सफल भएका छन् ।

एक्स्पोमा सुन, चाँदी, बहुमुल्य पत्थरबाट बनेका गरगहना प्रर्दशनीमा राखिएको छ । प्रर्दशनीमा राखिएको आधा किलो सुनको टोपीमा सर्वाधिक आकर्षण देखियो । सर्वोत्ममुखी सुनचाँदी गहना उद्योगको स्टलमा सुनको टोपीमात्र होइन, सुनको ठूलो जन्तर र चन्द्रमा पनि राखिएको छ ।

स्टलकर्ताका अनुसार टोपीको मूल्य २० लाख रुपैयाँ रहेको छ । मुलुककै अहिलेसम्मकै ठूलो दाबी गरिएको सुनको जन्तरको मूल्य साढे ७ लाख र चन्द्रमाको १५ लाख रुपैयाँ रहेको छ ।

यसैगरी राडोले सुन लेपन गरेका घडीहरु प्रर्दशनीमा राखेको छ । सुन लेपन गरिएका घडी एक लाख रुपैयाँदेखि तीन लाख रुपैयाँसम्म पर्ने स्टलकर्ताले जानकारी दिइन् ।

एक्स्पोमा राखिएका आकर्षक डिजाइनका गहनाले अवलोकनकर्ताको ध्यान खिचिरिहेका छन् । नेपालमा पनि आकर्षक गहना बन्छन् भन्ने सन्देश प्रर्दशनीले दिन सफल भएको छ ।

६० वटा स्टल रहेको एक्स्पोमा बहुमुल्य पत्थरका गहनाहरु पनि  प्रर्दशनीमा राखिएको छ । यी गहनाहरुले पनि ग्राहकको ध्यान खिचिरहेका छन् । खासगरी उच्च तथा मध्यम वर्गका परिवारलाई एक्स्पोले तानेको छ ।