लोडसेडिङ नहुँदा १६ अर्बको डिजेल बचत

६ मंसिर, काठमाडौं । तिहारयता काठमाडौं उपत्यका लगायत आसपासका क्षेत्रमा लोडसेडिङ अन्त्य भएपछि १६ अर्ब बराबरको इन्धन बचेको छ ।

ऊर्जामन्त्री जनार्दन शर्माले मन्त्रालयमा आयोजना गरेको छलफलका सहभागी नेपाल उद्योग वाणिज्य महासङ्घका अध्यक्ष पशुपति मुरारकाले विद्युत्भार कटौती अन्त्य गरिएपछि राजधानीमा मात्र १४ देखि १६ अर्ब बराबरको डिजेल बचत भएको अनुमानित तथ्याङ्क सुनाए ।

उद्योगमा लोडसेडिङ हट्दा राहत पुगेको भन्दै उनले यो अभियानलाई जारी राख्न महासङ्घले पूर्ण सहयोग गर्ने बताएका छन् ।

अर्का सहभागी ज्ञानेन्द्रलाल प्रधानले तत्कालका लागि ऊर्जा व्यवस्थापनमा सुधार गर्ने हो भने हालको मागलाई सम्बोधन गर्न सहयोग पुग्ने तबताए ।

होटल सोल्टी क्राउन प्लाजा, हिमालय होटेल, एअरपोर्ट होटेल लगायतका प्रतिनिधिले विद्युत्भार कटौती अन्त्यसँगै डिजेल खर्चमा कमी आई होटललाई ठूलो राहत पुगेको बताए । साथै आवश्यक परेका बेलामा होटेलसँग भएको डिजेल जेनेरेटरमार्फत सरकारलाई विद्युत् उपलब्ध गराउन आफूहरु तयार रहेको बताए ।

हाउजिङ एसोसिएसनका प्रतिनिधिले नेपाल सरकारलाई आवश्यक परेमा २५-३० मेगावाट सौर्य विद्युत् उत्पादन गर्न सकिने भएकाले अपार्टमेन्टका छत उपलब्ध गराउन आफूहरु तयार रहेको बताए ।

नेपाल प्रहरीका प्रतिनिधिले विद्युत् चोरीलाई पनि अन्य चोरी सरह सजायको कानुन बनाएमा प्रहरीले विद्युत् चोरी नियन्त्रणमा महत्वपूर्ण भूमिका खेल्ने वचन दिए ।

प्राधिकरणका कार्यकारी निर्देशक कुलमान घिसिङले ऊर्जाको माग व्यवस्थापनमा सहयोग गर्न सबैमा आग्रह गरेका छन् । रासस