पाँच राजदूतको सुनुवाइ आज

२१ साउन, काठमाडौं । संसदीय सुनुवाइ विशेष समितिले राजनीतिक कोटाबाट प्रस्तावित राजदूतहरूको सुनुवाइ आज गर्दैछ ।
केपी शर्मा ओली नेतृत्वको सरकारले प्रस्ताव गरेको राजदूतहरुको समितिले सुनुवाइ गर्न लागेको हो ।

समितिले बिहीबार सूचना प्रकाशित गरी उनीहरूलाई शुक्रबार बिहान सुनुवाइका लागि समितिमा उपस्थित हुन समितिले निर्देशन दिएको छ ।

प्रस्तावित राजदूतमा महेन्द्रबहादुर पाण्डे (चीन), नारद भारद्वाज वाग्ले (श्रीलंका), खड्ग केसी (जापान), शिवमाया तुम्बाहाम्फे (इजरायल) अलि अख्तर मिकरानी (साउदी अरेबिया) छन् ।

सरकार परिवर्तन भए प्रस्तावित राजदूतको सुनुवाइ रोकिने हो कि भन्ने आशंकाका बीच समितिले राजनीतिक कोटाबाट राजदूत प्रस्तावित व्यक्तिहरूको समेत सुनुवाइ थाल्न लागेको हो ।

समितिले बिहीबार बिहान बेल्जियमका लागि प्रस्तावित नेपाली राजदूत लोकबहादुर थापाको सुनुवाइ गरेको थियो ।

समितिले पाकिस्तानका लागि प्रस्तावित सेवा अधिकारी, ब्राजिलका लागि ताराप्रसाद पोखरेल, अस्टि्रयाका लागि प्रकाशकुमार सुवेदी, बेलायतका लागि दुर्गाबहादुर सुवेदी क्षेत्री र रूसका लागि ऋषिराम घिमिरेको सुनुवाइ सम्पन्न गरेको थियो ।