खाता पहिचान विवरण अद्यावधिक गर्न आग्रह

१६ असोज, काठमाडौं । नेपाल बैंकर्स संघले विभिन्न बैंक तथा वित्तिय संस्थाहरुमा खाता खोली आर्थिक कारोबार गर्दै आएका खाताधनीहरुलाई ग्राहक पहिचान विवरण -केवाइसी) तथा अन्य कागजात अद्यावधिक गर्न आग्रह गरेको छ । बैंकिङ कारोबारलाई सुरक्षित र पारदर्शी गराउन सरकारले जारी गरेका ऐन र निर्देशनअनुसार बैंक तथा वित्तीय संस्थाहरुले ग्राहक पहिचान विवरण र अन्य कागजातहरु अद्यावधिक गरिरहेका छन् ।

केवाइसी र अन्य कागजात अद्यावधिक नगराउँदासम्म बैंक तथा वित्तीय संस्थाहरुले ग्राहकहरुलाई उक्त खाताबाट कारोबार गर्न रोक लगाएछन् । खाता अद्यावधिक गराउन ग्राहकहरुले खाता खोलिएको बैंकको सम्बन्धीत शाखामा सम्पर्क राख्नुपर्ने हुन्छ । अहिले सबै बैंक तथा वित्तिय संस्थाहरुले ग्राहक पहिचान विवरण र अन्य कागजातहरु अध्यावधिक गरिरहेका छन् ।

खाता अद्यावधिक गर्न चाहिने कागजातहरु

– हालसालै खिचिएको पासपोर्ट साइजको फोटो

– स्पष्ट विवरण भएको प्रमाणपत्रको सक्कल

– हाल बसोबास गरिरहेको ठेगाना पुष्टि हुने जग्गाधनी प्रमाणपत्र अथवा पानी वा बिजुलीको बिल तिरको रसिद

– फर्म वा कम्पनीको खाताको हकमा सोसँग सम्बन्धीत कागजातका अतिरिक्त खाता सञ्चालनका लागि अख्तियार प्राप्त व्यक्तिको पहिलो र दास्रो बुँदामा उल्लेख कागजातहरु

– सार्वजनिक संस्थान, सरकारी कार्यालयहरु, विदेशी नियोगका कार्यालय, विदेशी संस्थाहरुको हकमा खाता संचालनका लागि अख्तियार प्राप्त व्यक्तिहरुको पहिलो र दोस्रो बुँदामा उल्लेखित कागजपत्रहरु

– सम्बन्धीत संस्थाहरुले आवश्यक ठानेका अन्य विवरण तथा कागजातहरु