यो साता फाइनान्स र बैंकिङमा उच्च वृद्धि, यी हुन् मूल्य धेरै बढेका कम्पनी

३२ साउन, काठमाडौं । गत साता २७६६.६२ अंकमा रहेको सेयर बजार यो साता ३०००.८१ अंकमा रहेर बन्द भएको छ । यो साता ८.४ प्रतिशत अर्थात् २३४ अंकले बजार बढेको छ ।

यो साता पहिलो दिन आइतबार ९४.४६ अंक बढेको बजार सोमबार ७०.८१  बढे पनि मंगलबार ८.१८ घट्यो । बुधबार ३४.२९ र बिहीबार ४३.०५ अंक बढ्यो । बजारको परिसूचक बढ्दा यो साता कारोबार रकमले पटक पटक अघिल्ला रेकर्ड ब्रेक गर्‍यो ।

अन्तिम कारोबार दिन बिहीबार हालसम्मकै उच्च करिब ३० अर्बको कारोबार भयो । आइतबार २५ अर्ब ७७ करोड, सोमबार २७ अर्ब २४ करोड, मंगलबार २१ अर्ब ५१ करोड, बुधबार २३ अर्ब ४३ करोडको कारोबार भयो ।

बजारमा रकम भित्रिँदै जाँदा कारोबार रकम पनि बढ्दै गएको छ । अर्कोतिर दैनिक रुपमा बजार पुँजीकर (सूचीकृत सबै सेयरको मूल्य) मा नयाँ रेकर्ड बन्दै गएको छ । हाल बजारको पुँजीकरण (आकार) ४७ खर्ब ६५ अर्ब पुगेको छ । सर्वसाधारण समूहको सेयरको मात्रै पुँजीकरण (फ्लोट मार्केट क्याप) १६ खर्ब ८० अर्ब पुगेको छ।

बैंक तथा वित्तीय संस्थाहरूले भदौका लागि ब्याजदर घटाएका छन् । जसले गर्दा आगामी साता बजार वृद्धिमा थप टेवा पुग्न सक्नेछ । आगामी साता सोमबार र मंगलबार भने सार्वजनिक बिदाका कारण बजार बन्द रहनेछ ।

यो साता बजारमा समूहगत उतारचढाव 

फाइनान्स र बैंकिङमा उच्च वृद्धि

यो साता फाइनान्स र बैंकिङ समूहमा उच्च वृद्धि देखियो । फाइनान्स समूहको सूचक १५ र बैंकिङ समूह १३.७ प्रतिशत बढे । फाइनान्स समूहको सूचक यो साताको बुधबार हालसम्मकै उच्च ३,९६९ अंकमा पुगेको थियो । यद्यपि बिहीबार भने यो सूचक १२१ अंक (३.०५ प्रतिशत) घट्यो र हाल ३८४८ अंकमा कायम भएको छ ।

फाइनान्स कम्पनीहरुले सार्वजनिक गरेको चालु आर्थिक वर्षको चौथो त्रैमासिक वित्तीय विवरण कमजोर देखिए पनि न्युन पुँजीका कारण यो क्षेत्रको सूचकमा उच्च वृद्धि देखिएको हो ।

फाइनान्समा अन्य क्षेत्रको तुलनामा जोखिम पनि बढेको छ । बजारमा १५ वटा फाइनान्स कम्पनी सूचीकृत छन् । जसमध्ये करिब आधाले यो वर्ष लाभांश दिने क्षमता छैन । लाभांश दिन सक्ने क्षमता भएकाहरुको पनि दोहोरो अंक दरमा दिने क्षमता छैन ।

फाइनान्सपछि यो साता बैंकिङमा उच्च वृद्धि देखियो । सो समूहको सूचक १३.७ प्रतिशत बढ्यो । गत साता बैंकहरुले सार्वजनिक गरेको वित्तीय विवरण त्यति सन्तोषजनक नभए पनि मूल्य न्यून रहेकाले यस क्षेत्रमा आकर्षण देखिन्छ । न्यून मूल्यका वाणिज्य बैंकको सेयरमा  अझ आकर्षण देखिएको छ ।

अन्तिम कारोबार दिन बिहीबार मात्रै नेपाल इन्भेस्टमेन्ट मेगा, एनएमबी, ग्लोबल आईएमई, कुमारी, हिमालयन र माछापुच्छ्रे  बैंकको मूल्य ८ प्रतिशतभन्दा धेरै बढ्यो । यी बैंकको मूल्य अझै पनि ३ सयमुनि छ ।

यो साता मूल्य उच्च दरमा बढेका कम्पनी

उच्च कारोबार
यो साता पनि सेयर बजारमा समूहत रुपमा उच्च कारोबार हुनेमा हाइड्रोपावर समूह अगाडि रह्यो । चारै दिन हाइड्रोपावर समूहको कारोबार रकम ७–७ अर्बभन्दा माथि रह्यो।

अन्तिम दिन बिहीबार भने यो समूहको कारोबार रकम हालसम्मकै उच्च रह्यो । सो दिन मात्रै यस समूहको १० अर्ब ३२ करोड रुपैयाँको कारोबार भयो । बिहीबार कुल कारोबारमा हाइड्रोपावर समूहको मात्रै अंश ३४.४ प्रतिशत हो ।

त्यस्तै यो साता उच्च रकमको कारोबार हुने कम्पनीमा हिमालयन रिइन्स्योरेन्स, शिवम् सिमेन्ट, नेपाल फाइनान्स, निफ्रा, अपि पावर, सानिमा माइ हाइड्रोपावर र माथिल्लो तामाकोशी क्रमशः अगाडि रहे । उच्च कारोबार सेयर संख्याका आधारमा यो साता माथिल्लो तामाकोशी, निफ्रा, अपी पावर, हिमाल दोलखा हाइड्रोपावर, कुमारी बैंक र अरुणभयाली हाइड्रोपावर क्रमशः अगाडि रहे ।

यो साता मूल्य उच्च दरमा घटेका कम्पनी