‘सुकुल गुण्डा’ जीवनसँग जम्ने भो खुश्वुको जोडी

नायक जीवन लुइटेल निर्धारित समय भन्दा करिब डेढ घन्टा ढिलो आइदिदा काठमाण्डौमा आयोजना भएको एक सिनेमाको शुभमुहुर्त कार्यक्रम निक्कै ढिलो सुरु भयो । मधुसुदन भट्टराइको निर्देशनमा तयार हुन लागेको चलचित्र ‘सुकुल गुण्डा’मा नायक लुइटेल मुख्य कलाकारको रुपमा देखिदैछन् । चलचित्रमा उनको साथमा श्रीदेव भट्टराई, सुशिल पोखरेल, राजकुमार शाह, खुश्वु खड्का, रामचन्द्र अधिकारी, संजय कार्की, रश्मी भट्ट, रमेश बस्नेत, शान्ती थापा, इन्द्र श्रेष्ठ लगायतका कलाकारको अभिनय छ ।

राजेश शाक्य, महेश प्रसाद मुडभरी, रमेश बस्नेतको निर्माणमा तयार हुन लागेको यो चलचित्रको मंगलबार काठमाण्डौमा शुभमुहुर्त गरिएको हो । नेपाल चलचित्र कलाकार संघका अध्यक्ष नबल खड्काले क्ल्याप हानेको कार्यक्रममा द्वन्द्व कलाकार संघका अध्यक्ष योगेन्द्र श्रेष्ठले नरिबल फोडेका थिए । शुभमुहुर्त कार्यक्रममा नायक जीवन लुइटेल र कलाकार खुश्वु खड्काले संवाद बोलेका थिए ।सामान्य मानिसको दृष्टिमा मानिस जस्तो देखिन्छ, त्यो नहुने भन्दै उसको जीवनमा नाटकिय परिवर्तन हुन्छ भन्ने कथालाई सिनेमाले उठान गर्न खोजेको छ ।

अभावै अभावमा हुर्केको सुन्दर नामको पात्र र उसको जीवनमा सुष्मा नामकी युवतीको प्रवेशसँगै आउने परिवर्तनलाई सिनेमाको मुख्य बिषय बनाइएको छ ।चलचित्रमा एम.पी मुडभरीको कथा, सुशिल पोखरेलको पटकथा तथा संवाद, शिव ढकालको छायांकन, कुमार महर्जनको द्वन्द्व, कमल राई र प्रदिप श्रेष्ठको नृत्य, शरण जोशीको संगीत रहनेछ ।