एक वर्षपछि तातोपानी नाका सञ्चालन

५ वैशाख, चौतारा। भूकम्पका कारण एक वर्षदेखि बन्द रहेको चीनसँगकाे तातोपानी नाका अस्थायी रुपमा सञ्चालनमा आएको छ ।

करिब दुई सय कन्टेनरमा राखिएका चिनियाँ तयारी पोशाक, जुत्तालगायत सामान अस्थायी रुपमा व्यवस्थापन गर्न चीन सरकार सहमत भएपछि शुक्रबारदेखि सो नाका सञ्चालनमा आएको तातोपानी भन्सार प्रमुख दिव्यराज पोखरेलले बताए ।

गोदाममा थन्किएका करिब पाँच सय ट्रक सामानमध्ये कतिपय अन्यत्र नाकाबाट नेपाल भित्रिसकेका छन् ।

“करिब दुई हप्ताभित्र सबै सामान आइसक्छ” उनले भने । उक्त सामान नेपाल भित्रिएपछि  दुई करोडदेखि  तीन करोड रूपैयाँ सम्म राजस्व सङ्कलन हुने भन्सार प्रमुख पोखरेलले जानकारी दिए ।  रासस