केपी ओलीले गल्ती गरे, अब राजीनामा दिनुपर्छ: नारायणकाजी

२९ असार, काठमाडौं । माओवादी पार्टी सरकारबाट बाहिरिएकोमा शीर्षनेता नारायणकाजी श्रेष्ठ असन्तुष्ट छन् भन्ने राजनीतिक बजारमा चर्चा छ । नेता श्रेष्ठको असन्तुष्टि वा फरक मत केमा हो ? अनलाइनखबरले यसबारे जान्न खोज्दा उनले यसरी व्याख्या गरेः

सरकारबाट समर्थन फिर्ता लिने माओवादी केन्द्रको निर्णयप्रति मैले विरोध जनाएको भन्ने जहाँसम्म कुरा छ, यस्तो निर्णय हुनुपूर्व औपचारिकरुपमा जानकारी भएन । मैले मिडिया र टेलिफोनबाट थाहा पाएँ । तर, यो आन्तरिक विषय भएको हुनाले यसबारे म पार्टीभित्रै आफ्ना कुराहरु राख्छु ।

ओलीको गल्तीः भद्र सहमतिको उल्लंघन

हाम्रो पार्टीको निर्णय राष्ट्रिय सहमतिको सरकार बनाउन पहल गर्ने भन्ने हो । तर, मुख्यतः कांग्रेसको अर्धेल्याइँ र एमालेको तत्परताको अभावका कारण राष्ट्रिय सरकार बन्न सकेन ।

राष्ट्रिय सरकार बन्न नसक्ने अवस्थामा बहुमतीय सरकार बन्ने अवस्था आएपछि यसमा मेरो धारणा के थियो भने अहिलेको यही गठवन्धनलाई नै कायम राखेर नयाँ सरकारको नेतृत्व हामीले लिनुपर्छ भन्ने हो । म केपी ओली नेतृत्वको सरकारको निरन्तरताको पक्षमा उभिएको भन्ने प्रचार गलत हो ।

एमाले र हामीवीच सत्ता हस्तान्तरणको भद्र सहमति भएकै हो । तर, त्यसलाई कार्यान्वयन नगरेर एमाले र सो पार्टीका अध्यक्ष केपी ओलीले गल्ती गरे । यसो गरेर ओलीले परिस्थितिलाई यहाँसम्म ल्याउने आधार दिए ।

यो सम्भव छ भन्ने प्रश्न पनि उठ्छ । यो गठबन्धनलाई नभत्काइकन प्रचण्डको नेतृत्वमा राष्ट्रिय सहमतिको सरकार बनाउन सम्भव थियो भन्ने मेरो भनाइ हो । अहिलेको गठबन्धनलाई नभत्काइकन हाम्रो नेतृत्वको सरकार बनाएर कांग्रेसलाई पनि ल्याउने तरिका अपनाइनुपर्थ्यो र मेरो विचारमा समचेतापूर्वक कदम चालेको भए सकिन्थ्यो ।

अब ओलीले राजीनामा दिनुपर्छ

अब आफ्नो सहयोगी दलले समर्थन फिर्ता लिएपछि अब प्रधानमन्त्री केपी शर्मा ओलीले राजीनामा दिनुपर्छ । राजीनामा नदिएर ओलीले गल्ती गरेका छन् । नैतिकताको कोणबाट पनि अनुपयुक्त काम गरेका छन् ।

यदि सरकारमै नभएको अर्को कुनै दलले ओलीलाई समर्थन गर्ने संकेत दिएको भए संसद फेस गर्छु भन्नु स्वभाविक हुन्थ्यो । तर, त्यस्तो केही देखिएको छैन । त्यसैले प्रधानमन्त्री केपी ओलीले राजीनामा नदिएर गल्ती गरेका छन् ।

(माओवादी नेता श्रेष्ठसँग कुराकानीमा आधारित)