३२, असार काठमाडौं । नेकपा एमालेको १ सय ५९ सदस्यीय नवनिर्वाचित केन्द्रीय कमिटीमा नवनिर्वाचित अध्यक्ष केपी शर्मा ओली प्यानलले बहुमत पाएको छ । ११४ पूर्ण केन्द्रीय सदस्य र बैकिल्पकसहितको १५९ सदस्यीय दुवैमा ओलीको स्पष्ट बहुमत आएको छ । यसअघि झलनाथ खनाल अध्यक्ष हुँदा पनि केन्द्रीय कमिटीमा भने ओली पक्षको बहुमत थियो ।

पदाधिकारीमा ओली र नेपालको प्यानलबाट बराबरी भए पनि केन्द्रीय कमिटीमा ओलीले सुबिधाजनक बहुमत प्राप्त गरेका छन् । पदाधिकारीमा सात-सात जनाले जितेकाले बरिष्ठ नेता झलनाथ खनाल निर्णायक भएका छन् । एमालेको १५ सदस्यीय पदाधिकारीमा बरिष्ठ नेता पनि पर्छन् ।

बरिष्ठ नेता झलनाथ खनाल बाहेक अन्य १ सय १४ जना पूर्ण केन्द्रीय सदस्यमा ओली पक्षका ६७ जना निर्वाचित भएका छन् भने नेपाल प्यानलबाट ४७ जनाले सफलता हात पारेका छन् ।

जनजाति, महिला, मधेशी, दलित लगायत आरक्षित कोटाबाट ओली पक्षका केन्द्रीय सदस्य बढी जितेकाले ओली प्यानल बहुमतमा पुगेको हो । बैकल्पिकतर्फ पनि ओली प्यानलकै बहुमत सदस्य जितेका छन् । पदाधिकारीमा भने दुवै पक्षको बराबरी छ भने बरिष्ठ नेता खनालको यसमा गणना भएको छैन ।

ओली पक्षले पदाधिकारीमा ७, खुल्ला केन्द्रीय सदस्यमा १७, महिलामा ९, जनजातिमा ९, दलितमा ५, अन्चलतर्फ ९, पिछडिएको क्षेत्रबाट २, मुस्लिम २ र मधेशीबाट ७ सहित ६४ जना केन्द्रीय सदस्यमा जित हासिल गरेको छ ।

त्यस्तै नेपाल पक्षले पदाधिकारीमा ७, खुल्ला केन्द्रीय सदस्यमा १८, मधेशीमा २, जनजाति ३, महिलामा ८, सम्पर्क बिभागबाट १, अञ्चलबाट ६ र पेशागत निर्वाचन क्षेत्रबाट २ जना गरि ४७ जना केन्द्रीय सदस्यमा सफलता पाएको छ । बैकल्पिकतर्फ ओली पक्षले २२ र नेपाल पक्षले १२१ सदस्य जितेको छ ।

दलित, पिछडिएको क्षेत्र, मुस्लिमतर्फ  नेपाल पक्षको निल भएको छ भने सम्पर्कमा ओली पक्षले कुनै सिट जितेन ।

केन्द्रीय सदस्यको पूर्ण सूची