प्रशिक्षण छाडेर क्रिकेटर राजकुमार जापानतिर

२८ साउन, काठमाडौं । राष्ट्रिय क्रिकेट टोलीका भेट्रान स्पिनर राजकुमार प्रधान बन्द प्रशिक्षण छाडेर फेरि विदेशिएका छन् ।
वैदेशिक रोजगारीका लागि राजकुमार शुक्रबार नै जापान गएको उनी निकट स्रोतले जानकारी दिएको छ ।
अर्को महिना दक्षिण कोरियाको इन्चोकमा हुने १७ औं एसियाली खेलकुदका लागि १९ सदस्यीय प्रारम्भिक नेपाली टोलीमा राजकुमारको नाम पनि छ । त्यसका लागि नेपाल क्रिकेट संघ (क्यान)ले बुधबारदेखि राजधानीमा बन्द प्रशिक्षण राखेको नागरिकमा खबर छ ।
राजकुमार भने बन्द प्रशिक्षणमा पनि गएनन् । उनले क्रिकेट संघलाई आफू व्यक्तिगत कारण क्याम्पमा आउन नसकेको जनाएका थिए । कप्तान पारस खड्कालाई जापान जानेबारे जानकारी गराएको बताइएको छ । पारस हाल इङ्ल्यान्डमा छन् ।
३८ वर्षे राजकुमार तीनपटक वैदेशिक रोजगारीका लागि कतार गएर लामो बसाइपश्चात स्वदेश फकँदै राष्ट्रिय टोलीमा पुनरागमन गर्न सफल भएका थिए । सन् २००० मा दोस्रोपटक कतार गएर फर्किएपछि उनले अर्को वर्ष राष्ट्रिय टोलीमा स्थान बनाए । २००१ मा क्यानडामा भएको आइसीसी ट्रफीमा उनलाई पहिलोपल्ट टोलीमा राखिएको थियो ।