२८ जेठ, काठमाडौं । नेपाल र चीनको बोर्डर नजिकै रहेको सिन्धुपाल्चोकको तातोपानीस्थित लिपिङ खोलामा १६.२६ मेगावाटको हाइड्रोपावर हिमरिभर पावर कम्पनीले निर्माण गर्ने भएको छ ।
यो परियोजनाको नेपाल विद्युत प्राधिकरणसँग शुक्रबार विद्युत खरिद बिक्री सम्झौता भएको कम्पनीका प्रबन्ध सञ्चालक रामकाजी पौडेलले जानकारी दिए ।
पौडेलका अनुसार स्वदेशी पुँजी र श्रोतमा निर्माण हुने हाइड्रपावरको निर्माण कार्य चाँडै सुरु हुनेछ । २०७७ बैशाखमा उत्पादन सुरु गर्ने लक्ष्य राखिएको हाइड्रोमा तीन अर्ब लगानी लाग्ने छ ।
परियोजनामा ७० प्रतिशत बैंक ऋण र ३० प्रतिशत इक्विटी शेयर लगानी गरिने भएको छ । लामो साँगुमा रहेका सव-स्टेशनमा उत्पादित विद्युत जोडी राष्ट्रिय प्रसारणमा जोडिने पौडेलले बताए ।
हिमनदी र पर्याप्त पानीको श्रोत रहेको यस परियोजनामा हिउँदको समयमा पनि धेरै मात्रामा विद्युत उत्पादन हुने बताइएको छ ।
