निर्देशक तथा निर्माता मिलन चाम्सले आफ्नो नयाँ प्रोजेक्ट ‘ब्लाइन्ड रक्स’मा बैंकर अनिल केशरी शाहलाई पनि अनुवन्धित गरेका छन् । दृष्टिबिहिन श्रृष्टी केसीमाथि बन्न लागेको यो फिल्ममा अभिनेत्री वेनिशा हमाल मुख्य भूमिकामा छिन् । यो फिल्ममा अनिल महत्वपूर्ण भूमिकामा रहेको मिलनले जानकारी दिएका छन् ।
उनले शाहको भूमिका हिरो सरह भएको समेत खुलाए । फिल्ममा गौरी मल्ल, अर्पण थापा, शिशिर राणा पनि देखिनेछन् । निकेश लिम्बुको निर्माण बन्न लागेको यो फिल्मको छायांकन चाडै नै सुरु हुँदैछ । फिल्मको पोखरामा वर्कशप सकेर यसको निर्माणपक्ष काठमाण्डौ आइसकेको छ । हरि लम्साल र ताराप्रकाश लिम्बुको संगीत रहेको चलचित्रलाई नवराजकृष्ण थापाले छायांकन गर्दैछन् ।
वैंकर अनिल शाह नेपाली फिल्मसँग नजिक मानिन्छन् । फिल्मका प्रिमियर र विभिन्न कार्यक्रममा उनी पुग्ने गरेका छन् । श्रृष्टीको बायोपिकमा फिल्म बनाउन अनिलले मिलनलाई सहयोग पनि गरेका थिए ।
