राप्रपाबाट एमाले आएर सांसद, खगराजको मन जित्दा शक्तिशाली मन्त्रालय

१७ भदौ, पोखरा । सुरेन्द्रराज पाण्डे नेतृत्वको सरकारमा नेकपा एमाले सहभागी हुँदा प्रकाशबहादुर केसीले भौतिक पूर्वाधार मन्त्रालयको जिम्मेवारी पाएका छन् ।

सत्ताको रस्साकस्सीमा दुई पटकसम्म यो मन्त्रालय दीपक मनाङे भनिने राजीव गुरुङले हात पारेका थिए । सबभन्दा ठूलो दल कांग्रेस र एमालेबीच सत्ता साझेदारी भएपछि भौतिक पूर्वाधार मन्त्रालय एमालेले लिने पक्का जस्तै थियो ।

मूख्यमन्त्री पाण्डेलाई संकटमा साथ दिएका मनाङे र फणिन्द्र देवकोटालाई नहटाउन दुई वटा मन्त्रालय फुटाएर भागबण्डा मिलाएपछि एमालेले सोमबार मन्त्रीहरुको नाम लियो । पद्‍मा जिसीको नेतृत्वमा एमालेका चार मन्त्री भए ।

त्यसमा केसी भौतिक पूर्वाधार मन्त्री भए । केसी एमाले संसदीय दल तथा पूर्व मुख्यमन्त्री खगराज अधिकारीको विश्वास पात्र हुन् । त्यसकै बलमा अघिल्लो चुनावताका एमाले प्रवेश गरेर समानुपातिक पद्धतिबाट सांसद बन्न सफल भएका थिए ।

यो पटक भौतिक पूर्वाधारमन्त्री बन्न अरु सांसद पनि आंकाक्षी थिए । तर एमाले नेता खगराजले पार्टीका महासचिव शंकर पोखरेलका साथै पार्टी अध्यक्ष एवं प्रधानमन्त्री केपी शर्मा ओलीलाई समेत भेटाएर मन्त्री बनाएका हुन् ।

लामो समय राष्ट्रिय प्रजातन्त्र पार्टी (राप्रपा)को राजनीति गरेका केसी २०५४ देखि २०५८ सालसम्म नगर परिषद सदस्य थिए । राजा ज्ञानेन्द्र शाहको शासनकालमा तत्कालीन पोखरा उपमहानगरपालिका–१२ को वडाध्यक्ष भए ।

२०७१ सालदेखि २०७५ सालसम्म लगातार २ पटकसम्म नेपाल खाद्य संस्थानको अध्यक्ष थिए । २०७४ सालको चुनावअघि राप्रपाका पूर्वसांसद सूर्यबहादुर केसी कांग्रेस प्रवेश गर्दा उनका बहिनी ज्वाइँ केसी भने एमालेतिर लागेका थिए ।

एमालेको प्रदेश कमिटी सचिवालय सदस्य भएर काम गरेका उनी यो पटक समानुपातिक सांसद भए ।

त्यसपछि अर्थ तथा विकास समितिको सभापति भएका थिए । ‘पहिले रोलक्रम मिचेर सामानुपातिक सांसद बनाउनु भयो । चुनावमा सहयोग गरेको र नेताहरुसँग निकट भएकै कारण अहिले मन्त्री बनाइयो,’ मन्त्रीका आकांक्षी एक एमाले सांसदले भने ।

पूर्व मुख्यमन्त्री एवं संसदीय दलका नेता खगराजको प्रदेशसभा क्षेत्र कास्की क्षेत्र नम्बर १ का प्रकाशबहादुरलाई आफूले जे भन्यो त्यही हुने भएकाले नै मन्त्री बनाएको एमालेका सांसदहरुको गुनासो छ ।

हुन त हरेक सांसद मन्त्री बन्न सक्छन् । तर पार्टी नेतृत्वले क्षमता, दक्षता र योगदानलाई हेरेर मन्त्री नियुक्त गर्ला भन्ने आश गरेपनि त्यसो नभएको अर्का एक सांसदले गुनासो गरे ।

उनले अगाडि भने, ‘उहाँ मन्त्री हुने चर्चा त थियो, तर खगराज माननीयले विवेक पुर्‍याउनुहुन्छ भन्ने थियो, उहाँले आफैैंमाथि नैतिकताको प्रश्न उठ्ने ठाउँ राख्नुभयो ।’

एमाले पोलिट्ब्यूरो सदस्य लीलबहादुर थापाले पार्टीमा गुट र विकृति मौलाएको देखिएको टिप्पणी गरे ।

मन्त्रीहरुको अनुहार हेर्दा खसआर्यको बश्चर्व देखिएको र समावेशी सिद्धान्तलाई पनि ख्याल नगरिएको उनको भनाइ थियो ।

‘हाम्रो राजनीतिमा विकृति हाबी भयो तलदेखि माथिसम्मै । पद केन्द्रित भयो, गुट केन्द्रित भयो, सत्ता केन्द्रित भयो,’ थापाले भने, ‘मुखले समाजवाद भन्ने तर व्यवहार गुटवादतिर भयो ।’