निशा अधिकारीमा देखियो अव्यवसायिकता, आधा गीतमा नाँचेर हिमाल चढ्न उडिन्

नायिका निशा अधिकारीका कारण एक चलचित्रको आधा मात्र गीत खिचेर सार्वजनिक गरिएको छ । चलचित्र ‘लुटेरा’मा समावेश ‘मैले तिमीलाई मन पराएको अवस्था’ बोलको गीत आधा मात्र खिचेर सार्वजनिक गरिएको हो ।

निर्माता गोपाल कायस्थले अनलाइनखबरसँग भने-‘निशा जीले समय नदिएकाले आधा मात्र खिचेका हौ । उहाँ गीत आधा खिचेर विदेश उड्नु भयो । अब उहाँ आएपछि बाँकी गीत खिचिनेछ ।’ नायक निखिल उप्रेतीसँग निशाले गीतमा छोटो कपालमै नृत्य गरेकी छिन् ।

निखिललाई चलचित्र ‘भैरव’मा दर्शकले जुंगा पालेको मन पराएपछि यो चलचित्रको गीतमा पनि जुंगामा देखाइएको छ । निर्माता कायस्थल निखिललाई दर्शकले जुंगामा मन पराएकाले यसो गरिएको बताउँछन् ।

दयाराम दाहाल निर्देशित यो चलचित्र कात्तिक २७ गतेबाट प्रदर्शनमा आउँदैछ । आधा मात्र गीतमा नृत्य गरेर निशा अफ्रिकाको किलिमनजारो हिमाल चढ्न त्यता पुगिसकेकी छिन् ।

यसअघि पनि निशा अमेरिका उडेकाले यसको निर्माणपक्षले गीत खिच्न पाएको थिएन । चलचित्र प्रदर्शनको समय आइसकेकाले पनि निर्माता कायस्थले चाडै ट्रेलर सार्वजनिक गर्ने बताए । अब आधा गीत भने दर्शकले पर्दामा मात्र हेर्न पाउनेछन् । यो गीतमा रामजी लामिछानेको कोरियोग्राफी छ ।