१४ असार, काठमाडौं । उपत्यकामा पछिल्लो समय नयाँ बस्तीका रुपमा विकास भएको छ, टोखा क्षेत्र । विद्यालयदेखि ठूलो अस्पताल पनि खुलेका छन् । ग्राण्डी अन्तराष्ट्रिय अस्पताल त्यही छ ।
तर त्यही टोखा जाने सडकको हालत भने हेरिनसक्नु भएको छ । दैनिक ठूला तथा साना गाडीहरु हिलोमा गाडिएर फस्छन् र विरामी लिएर अस्पताल जाँदै गरेको एम्बेलुेन्स समेत जाममा पर्छ ।
सडक यति जीर्ण हुनुको एउटै कारण हो, समयमै मर्मत नहुनु । यात्रुहरुले दैनिक कस्ट झेलिरहँदा पनि सडक विभागका अन्तरगतको काठमाडौं सडक डिभिजन कार्यालयले भने मर्मत गर्न चासो देखाएको छैन ।
विभागलाई यो सडकको दुरवास्थाबारे जानकारी नभएको भने होइन । सडक विभागका प्रवक्ता शिबहरि सापकोटा बजेट अभावका कारण सडक मर्मत हुन नसकेको बताउँछन् । उनको भनाइमा चालु आर्थिक वर्षमा यो सडकमा कालोपत्रे गर्न सम्भव छैन ।
‘यतिबेला कालोपत्रे गरेर पनि अर्थ हुँदैन, त्यसैले हामी तत्कालै सडकको अवस्था सुधार्न ग्राभलिङ गर्छाैं,’ उनी भन्छन्, ‘अर्को वर्षको बजेटमार्फत यस्ता जीर्ण भएका सडकलाई प्रामिकता दिएर कालोपत्रे गर्ने योजनामा छौं ।’