घरमा कुकुरको बच्चा ल्याउँदै हुनुहुन्छ, कसरी नाम जुराउने ?

चकलेट तथा फलफूलको नामबाट कुकुरको नाम राख्ने चलन विश्वमा प्रचलित छ । यसरी नाम राख्दा ऊ स्वास्थ्य हुन्छ र उसको आयु लामो हुन्छ भन्ने मान्यता छ । साथै कुकुरको नाम राख्दा उसको रङ र स्वभावअनुसार पनि राख्ने गरिन्छ । जस्तो-: खैरो रङको छ भने खैरे, कालो रङको छ भने काले आदि ।

घरमा कुकुरको बच्चा ल्याउनु भनेको एउटा नयाँ परिवारको सदस्य थप्नु जस्तै हो । यो एउटा रोमाञ्चक र जिम्मेवारीपूर्ण निर्णय हो, जसले जीवनमा खुसी, साथ र अनगिन्ती सम्झनाहरू थप्छ । तर, कुकुरको बच्चा घरमा आउनासाथ सबैभन्दा पहिलो र रमाइलो काम के हुन्छ भने उसको नाम जुराउनु ।

कुकुरको नाम उसको पहिचान बन्छ र यो उसको व्यक्तित्व, रुचि वा परिवारको भावनासँग जोडिन्छ । तर, कसरी एउटा पप्पीको उत्तम नाम छान्ने ?

किन नाम महत्त्वपूर्ण छ ?

कुकुरको नाम केवल उसलाई बोलाउने सङ्केत मात्र होइन, यो तपाईँ र पप्पी बीचको भावनात्मक सम्बन्धको प्रतीक पनि हो । कुकुरहरूले आफ्नो नाम सुनेर प्रतिक्रिया दिन सिक्छन् । त्यसैले यो छोटो, स्पष्ट र उच्चारण गर्न सजिलो हुनु जरुरी हुन्छ । साथै, नामले उसको स्वभाव, आकार, रङ वा व्यक्तिगत रुचिलाई पनि झल्काउन सक्छ । उदाहरणका लागि, एउटा चञ्चल कुकुरको नाम टाइगरू राखियो भने त्यो उसको ऊर्जाशील व्यक्तित्वसँग मेल खान्छ ।

नाम जुराउने तरिकाहरू

उसको व्यक्तित्व हेरेर

कुकुरको बच्चा घरमा ल्याएपछि उसको व्यवहारलाई केही दिन नियाल्नुपर्छ । ऊ शान्त छ, चञ्चल छ, वा खानेकुराको सौखिन छ ? यदि ऊ धेरै खेल्न मन पराउँछ भने रकी वा लुसी जस्ता नाम ठिक हुन सक्छ । शान्त स्वभावको कुकुरलाई सिलो वा माया जस्ता नाम सुहाउन सक्छ ।

रङ र आकारका आधारमा

कुकुरको रङ र आकारले पनि नामको लागि प्रेरणा दिन सक्छ । कालो कुकुरलाई कालु वा ब्ल्याकी, सेतो कुकुरलाई स्नोवी वा सेतु, र सानो आकारको कुकुरलाई सानु वा टिनी जस्ता नाम राख्न सकिन्छ । ठूलो कुकुरलाई हर्कुलस वा जाइएन्ट पनि रमाइलो विकल्प हुनसक्छ ।

प्रकृतिबाट प्रेरणा लिएर

प्रकृति प्रेमी हुनुहुन्छ भने कुकुरको नाम प्रकृतिसँग जोड्न सकिन्छ । सूर्य, चन्द्र, नदी, हिमाल जस्ता नामले कुकुरलाई विशेष र अर्थपूर्ण पहिचान दिन्छ । यस्ता नामले प्रकृति प्रेम पनि झल्किन्छ ।

फिल्म वा पुस्तकका पात्रहरूबाट

मन पर्ने फिल्म, कार्टुन वा पुस्तकका पात्रहरूबाट पनि नाम जुराउन सकिन्छ । ह्यारी-ह्यारी पोटरबाट, सिम्बा लाइन किङबाट, वा डोरेमोन जस्ता नामले कुकुरलाई पप-संस्कृतिसँग जोड्छ । यो तरिका विशेष गरी युवा पुस्तामाझ लोकप्रिय छ।

नाम छोटो र मिठो राख्नुपर्छ

कुकुरको नाम जुराउँदा यो कुरा याद राख्नुपर्छ कि कुकुरहरू एक वा दुई अक्षरको नाम छिटो बुझ्छन् । लियो, म्याक्स जस्ता नाम बोल्न र सुन्न सजिलो हुन्छ । लामो नाम जस्तै वेलिंगटन राख्दा कुकुरले बुझ्न गाह्रो हुन्छ र बारम्बार बोलाउन अप्ठ्यारो पर्छ । यदि लामो नाम नै राख्न मन छ भने त्यसको छोटो रूप प्रयोग गर्न सकिन्छ, जस्तै वेलिंगटलाई वेली ।

परिवारको सहमति लिने

कुकुरको नाम जुराउँदा परिवारका सबै सदस्यको राय लिनु राम्रो हुन्छ । सबैले मन पराउने नाम राख्दा कुकुरप्रति सबैको माया र अपनत्व बढ्छ । कसैले टम भन्यो, कसैले चारली भन्यो भने बहस हुन सक्छ, त्यसैले एउटा साझा नाममा सहमति गर्नु उत्तम हुन्छ ।

साँस्कृतिक र स्थानीय प्रभाव

नेपालमा कुकुरको नाम जुराउँदा हाम्रो सँस्कृति र स्थानीय भाषाबाट पनि प्रेरणा लिन सकिन्छ । भोटु भोटे कुकुरलाई सङ्केत गर्दै, लुते सानो र चञ्चल कुकुरलाई, शेरे शेरजस्तो बलियो कुकुरलाई । यस्ता नाम हाम्रो समाजमा प्रचलित छन् जसले कुकुरलाई स्थानीय पहिचान दिन्छ ।

नामको परीक्षण गर्ने

नाम जुराइसकेपछि त्यसलाई केही दिन प्रयोग गरेर हेर्नुपर्छ । कुकुरले कसरी प्रतिक्रिया दिन्छ ? बोल्न सजिलो लाग्छ कि लाग्दैन ? यदि नाम सुहाएन भने परिवर्तन गर्न सकिन्छ । कुकुरको बच्चा सानै छँदा उसले नयाँ नाम सजिलै सिक्छ ।

ध्यान दिनुपर्ने अन्य कुरा

कुकुरको बच्चा किन्ने सोचमा हुनुहुन्छ भने कुकुरको बच्चा कहाँबाट ल्याउने भन्ने कुरामा ध्यान दिनु निकै महत्त्वपूर्ण हुन्छ । आजकाल ‘पप्पी मिल’ भनिने ठाउँबाट कुकुरका बच्चाहरू बेचिन्छन्, जुन ठाउँ कुकुरको स्वास्थ्य र नैतिकताको हिसाबले विवादास्पद मानिन्छ ।

पप्पी मिल भनेको ठूलो संख्यामा कुकुरको प्रजनन् गराएर बच्चा उत्पादन गर्ने व्यावसायिक ठाउँ हो । जहाँ कुकुरको हेरचाहभन्दा नाफालाई प्राथमिकता दिइन्छ । यस्ता ठाउँबाट आएका कुकुरका बच्चाहरूमा स्वास्थ्य समस्या वा व्यवहारगत कमजोरी हुनसक्छ । त्यसैले कुकुरको बच्चा किन्दा केही कुरामा ख्याल गर्नुपर्छ ।

सबैभन्दा पहिला, कुकुरको बच्चा किन्नुअघि बिक्रेताको पृष्ठभूमि जाँच्नुपर्छ । पप्पी मिलबाट आएको हो कि भनेर थाहा पाउन उसको प्रजनन् स्थान, कुकुरको स्वास्थ्य रेकर्ड र आमाबाबुको अवस्था हेर्नुपर्छ ।

पप्पी मिलमा कुकुरहरूलाई साँघुरो ठाउँमा राखिन्छ, उचित खाना र व्यायामको सुविधा पाउँदैनन्, जसले बच्चाको शारीरिक र मानसिक विकासमा असर गर्छ । यदि बिक्रेताले यस्ता जानकारी दिन आनाकानी गर्छ भने शङ्का गर्नुपर्छ । दोस्रो, कुकुरको बच्चाको स्वास्थ्य जाँच गर्नुपर्छ । पप्पी मिलका कुकुरमा रोग वा जेनेटिक समस्या हुनसक्छ । पशु चिकित्सकसँग जाँच गराएर मात्र किन्नु सुरक्षित हुन्छ ।

सकेसम्म स्थानीय प्रजनन वा आश्रय स्थलबाट कुकुर लिनु राम्रो हुन्छ । आश्रय स्थलबाट लिँदा एउटा कुकुरको जीवन बच्छ र पप्पी मिलजस्ता क्रूर व्यवसायलाई निरुत्साहित गर्न सकिन्छ । कुकुरको बच्चा किन्दा उसको पृष्ठभूमि, स्वास्थ्य र हेरचाहमा ध्यान दिएर मात्र निर्णय लिनुपर्छ । यो सानो सावधानीले कुकुरको जीवन सुखमय बन्छ ।