अनलाइनखबरको ‘५० प्रभावशाली महिला’ छनोट मनोनयन फर्म

५० प्रभावशाली महिलामा किन मनोनयन गर्ने?

महिलाको क्षमता, प्रतिभा र योगदानलाई अझै पनि समाजले समान रूपमा पहिचान र सम्मान गर्न सकेको छैन। अवसरमा असमानता, संरचनागत विभेद र सामाजिक अवरोधका कारण धेरै महिला आफूभित्रको सम्भावना उजागर गर्न संघर्षरत छन्। उनीहरूको आवाज पर्याप्त रूपमा सुनिएको छैन र योगदानले पनि अपेक्षित मान्यता पाउन सकेको छैन।

यस्ता अनेक चुनौतीका बीच पनि महिलाहरूले आफ्नो प्रतिभा, लगनशीलता र निरन्तरको प्रयासबाट हरेक क्षेत्रमा उल्लेखनीय उपलब्धि हासिल गरिरहेका छन्। उनीहरू स्थापित मान्यता र अवरोधलाई चुनौती दिँदै नयाँ सम्भावनाका ढोका खोलिरहेका छन्। आफ्नो काम, नेतृत्व र विचारमार्फत समाजमा सकारात्मक परिवर्तन ल्याइरहेका छन्।

यिनै महिलाको संघर्ष, योगदान र उपलब्धिलाई सार्वजनिक पहिचान दिलाउने उद्देश्यले अनलाइनखबरले हरेक वर्ष अन्तर्राष्ट्रिय महिला दिवस अर्थात् ८ मार्चका अवसरमा ‘५० प्रभावशाली महिला’ सूची सार्वजनिक गर्दै आएको छ।

२०८० सालदेखि सुरु भएको यो पहलमार्फत नेपाली राजनीति, समाज, संस्कृति, कला, साहित्य, खेलकुद, शिक्षा, विज्ञान, उद्यमशीलतालगायत विभिन्न क्षेत्रमा उल्लेखनीय प्रभाव छाडिरहेका महिलालाई पहिचान र सम्मान गर्ने हाम्रो प्रयास हो। यो सूची केवल उपलब्धिको अभिलेख होइन, महिलाको संघर्ष, साहस, प्रतिभा, समर्पण र परिवर्तनकारी भूमिकाको सम्मान पनि हो।

यस वर्षको सूचीका लागि तपाईंले गर्नुभएको मनोनयन, अनलाइनखबरको समाचार कक्षले गरेको अध्ययन तथा विभिन्न क्षेत्रका जानकार, सरोकारवाला र विश्वसनीय स्रोतबाट प्राप्त सूचनाका आधारमा सम्भावित नामहरूको प्रारम्भिक सूची तयार गरिनेछ।

त्यसपछि उक्त सूची छनोट समितिसमक्ष प्रस्तुत गरिनेछ। समितिको मूल्याङ्कन, छनोट र सिफारिसका आधारमा अन्तिम ५० नाम तय गरी ८ मार्चमा सार्वजनिक गरिनेछ।

हामी विश्वास गर्छौं, तपाईंको एउटा मनोनयनले समाजमा महत्वपूर्ण योगदान दिइरहेकी तर पर्याप्त पहिचान नपाएकी महिलालाई सार्वजनिक मञ्चमा ल्याउन सहयोग पुर्‍याउन सक्छ।

आउनुहोस्, महिलाका उपलब्धि र योगदानलाई चिनाऔँ, उनीहरूको कामलाई सम्मान गरौँ र नयाँ पुस्ताका लागि प्रेरणाको स्रोत बनाऔँ।

कसलाई मनोनयन गर्ने?

हामी यस्तो सूची तयार गर्न चाहन्छौँ, जहाँ स्थान पाउने महिलाहरू केवल पद, पहुँच वा शक्तिका आधारमा होइन, आफ्नो प्रतिभा, मेधा, कर्म, निरन्तरको संघर्ष र समर्पणका कारण प्रभावशाली बनेका हुन्।

आफ्नो क्षेत्रमा नयाँ उपलब्धि हासिल गरेका, स्थापित मान्यतालाई चुनौती दिएका, कठिन परिस्थितिका बाबजुद परिवर्तनको नेतृत्व गरेका र समाजमा अर्थपूर्ण प्रभाव पारेका महिलालाई तपाईंले मनोनयन गर्न सक्नुहुन्छ।

राजनीति, सामाजिक अभियान, संस्कृति, कला, साहित्य, खेलकुद, शिक्षा, विज्ञान, प्रविधि, उद्यमशीलता, स्वास्थ्य, वातावरणलगायत कुनै पनि क्षेत्रमा योगदान पुर्‍याइरहेका महिला यस सूचीका सम्भावित उम्मेदवार हुन्।

हाम्रो उद्देश्य समाजका विविध तह र समुदायमा पुगेर योगदानकर्ताहरूको पहिचान गर्नु हो। विशेषगरी अवसर र संरचनागत लाभबाट वञ्चित रहँदै पनि आफ्नो क्षेत्रमा उल्लेखनीय काम गरिरहेका महिलाहरूको योगदान पहिचान गर्न हामी तपाईंको सहयोग चाहन्छौँ।

तपाईंको नजरमा प्रभावशाली र प्रेरणादायी लागेकी महिलाको नाम, उहाँले गरेको काम र त्यसले पारेको प्रभावसहित मनोनयन गर्नुहोस्। तपाईंको सुझावले महत्वपूर्ण योगदान पुर्‍याइरहेका तर सार्वजनिक पहिचानमा आउन नसकेका महिलालाई सूचीमा समेट्न मद्दत गर्नेछ।

आउनुहोस्, नेपाली समाज बदलिरहेका महिलाहरूलाई चिनौँ र उनीहरूको योगदानलाई उचित सम्मान दिऔँ।

धन्यवाद!

मनोनयन फाराम