२४ वैशाख, संखुवासभा । काठमाडौंको खुल्लामञ्चमा सटर बनाएर बिक्री गर्ने कम्पनीका ठेकदार मनोज भेटवालले काठमाडौंको पुरानो बसपार्क कब्जा गरेको धेरै वर्ष बितिसकेको छ । काठमाडौं टावर बनाउने भन्दै बसपार्क कब्जा गरे पनि सरकारले भेटवाललाई कुनै कारवाही गरेको छैन ।
यसैवीच भेटवालसँग पुरानो बसपार्कमा साझेदारी गरेकाे जयराम लामिछानेको स्वच्छन्द निर्माण कम्पनीले संखुवासभा र भोजपुर जोड्ने अरुण नदीमा पुल बनाउने ठेक्का लिएर सरकारी रकम झ्वाम पारेको छ । स्वच्छन्द कम्पनीले ०६७ सालमा अरुण नदीको लम्सुवाघाटमा पुल निर्माणको ठेक्का लिएको थियो ।
कुल १६ करोड ६३ लाखमा १६७ मिटर लामो पुल बनाउने ठेक्का स्वच्छन्द निर्माण कम्पनीले लिएको थियो । ०६७ सालमा लागेको ठेक्का ०७२ सालमा निर्माण सम्पन्न गर्ने शर्त थियो ।
तर, कम्पनीका ठेकेदार अहिलेसम्म कामै नगरी मोबिलाइजेसनको रकम लिएर बेपत्ता भएको भोजपुरस्थित षडानन्द नगरपालिकाका जनप्रतिनिधिको गुनासो छ ।
पुल बनाउने ठेकेदार वर्षौंदेखि बेपत्ता भएपछि यहाँका स्थानीयवासीलाई नदी पार गर्न समस्या पर्दै आएको छ । यहाँ मानिस मात्र होइन, सवारी साधनहरुसमेत डुंगामा राखेर जोखिमपूर्णरुपमा पार गर्नुपर्ने अवस्था छ ।
अरुण नदीको लम्सुवा घाट तराईबाट प्रदेश १ का मुख्यमन्त्री शेरधन राईको गृहजिल्ला जाने प्रवेशद्वार हो ।
काठमाडौंको पुरानो बसपार्क कब्जा गर्दै आएका ठेकदार भेटवाललाई अहिलेसम्म ओली सरकारले कुनै कारवाही नगरी संरक्षण गर्दै आएको छ ।
पुरानो बसपार्कमा कुनै काम नभए पनि काठमाडौं महानगरपालिकाले भेटवालको ठेक्कालाई नवीकरण गरिदिएर भेटवाललाई संरक्षण गरेको हो ।
तस्वीर- पत्रकार भविन कार्कीको फेसबुकबाट
