२३ मंसिर, सुर्खेत । दैलेखमा आफ्नै छोरी बलात्कार गरेको आरोपमा प्रहरीले एकजनालाई पक्राउ गरेको छ । मदिरा सेवन गरेर आफ्नै १४ वर्षीया छोरीलाई पटकपटक बलात्कार गरेको आरोपमा ३८ वर्षीय पुरुषलाई प्रहरीले पक्राउ गरेको हो ।
घरमा कोही नभएकोबेला ती पुरुषले आफ्नै छोरीलाई पटकपटक बलात्कार गर्दै आएको जिल्ला प्रहरी कार्यालय दैलेखका प्रमुख डीएसपी अनुपम श्रेष्ठले जानकारी दिए ।
डीएसपी श्रेष्ठका अनुसार ती पुरुषले गत शुक्रबार दिउँसो साढे चार बजे घरमा कोही नभएको मौका छोपी छोरीलाई जवरजस्ती करणी गरेका थिए ।
‘बलात्कार गरेको गोप्य सूचनाका आधारमा हामीले ती पुरुषलाई नियन्त्रणमा लिएका छौं,’ डीएसपी श्रेष्ठले अनलाइनखबरलाई भने, ‘दिनहुँ जसो मदिरा सेवन गर्ने र श्रीमती घरमा नभएको बेला पटकपटक करणी गरेको खुलेको छ ।’
प्रहरीले ती पुरुषलाई पक्राउ गरेपछि श्रीमतीले प्रहरीसामु उजुरी दिएकी थिइन् । ती पुरुषमाथि जबरजस्ती करणी मुद्दा दर्ता भई दैलेख जिल्ला अदालतबाट म्याद थपेर घटनाबारे थप अनुसन्धान थालिएको डीएसपी श्रेष्ठले बताए ।
