भ्रष्ट्राचार काण्डमा जेल परेकी दक्षिण कोरियाकी पूर्वराष्ट्रपतिलाई माफी

९ पुस, काठमाडौं । दक्षिण कोरियाको सरकारले भ्रष्टाचार मुद्दामा २२ वर्ष जेल सजाय काटिरहेकी पूर्व राष्ट्रपति पार्क गेउन हाईलाई माफी दिएको छ ।

दक्षिण कोरियाका राष्ट्रपति मून जाय इनले हाईलाई क्षमादान दिएको बीबीसीले जनाएको छ । भ्रष्टाचार काण्डमा दोषी ठहर भएपछि हाइले २२ वर्ष जेल सजाय काटिरहेकी थिइन् । उनी महाअभियोग लगाएर हटाइने पहिलो निर्वाचित राष्ट्रपति समेत हुन् । उनलाई २०१७ मा महाअभियोग लगाइएको थियो ।

हाईलाई सन् २०१८ मा शक्तिको दुरुपयोग गरेर अनैतिक दबाब दिएको अभियोगमा दोषी ठहर गरिएको थियो । उनीमाथि लगाइएका १८ वटा मुद्दामध्ये १६ वटामा दोषी ठहर भएकी थिइन् । यसमध्ये अधिकांश मुद्दा घुसखोरी तथा दबाबसम्बन्धी थिए ।

अदालतले निकट साथी चोय सुन सिलसँग मिलेर सीलले सञ्चालन गरेको संस्थाका लागि लाखौं डलर चन्दाका लागि स्यामसुङ र लोट्टे जस्ता कम्पनीलाई दबाब दिएको बताएको थियो ।

त्यस्तै, हाईले राष्ट्रपतीय कार्यालयका गोप्य कागजात सीललाई चुहाएको मुद्दामा समेत दोषी ठहर गरिएको थियो । तर उनले आफूमाथि लगाइएका सबै आरोप खण्डन गर्दै आएकी थिइन् ।

हाईलाई सुरुमा ३० वर्षको जेल सजाय र २० अर्ब वन बराबरको जरिवाना सुनाइएको थियो । तर पछि उच्च अदालतले जेल सजाय र जरिवाना दुबै कटौती गरेको थियो ।